دادو/کراچی: سندھ کے ضلع دادو میں نئی گاج ڈیم پر گزشتہ آٹھ ماہ سے جاری تعطل نے بالآخر اعلیٰ سطح پر توجہ حاصل کر لی ہے۔ وزیرِ اعظم کی معائنہ کمیشن ٹیم نے ڈیم پر کام کی بندش کا نوٹس لیتے ہوئے فوری طور پر کام دوبارہ شروع کرنے کا حکم دے دیا ہے۔
وزیراعظم انسپیکشن کمیشن نے چیف سیکریٹری سندھ کو باضابطہ خط ارسال کرتے ہوئے صورتحال پر سخت تشویش کا اظہار کیا ہے۔ خط میں کہا گیا ہے کہ نئی گاج ڈیم پر کام بند ہونا نہایت تشویشناک ہے اور واپڈا کو ہدایت کی گئی ہے کہ تمام رکاوٹیں دور کر کے تعمیراتی کام فی الفور بحال کیا جائے۔
کمیشن نے ایک ہفتے کے اندر انکوائری رپورٹ فراہم کرنے کی بھی ہدایت کی ہے تاکہ ذمہ داروں کا تعین کیا جا سکے اور منصوبے کو مزید تاخیر سے بچایا جا سکے۔ تحقیقات کے دوران سامنے آنے والے حقائق کے مطابق ڈیم کی تعمیر آٹھ ماہ سے عدم ادائیگیوں کے باعث رکی ہوئی ہے۔
کمیشن نے اس صورتحال پر سخت ناراضی ظاہر کرتے ہوئے کمشنر حیدرآباد اور ڈپٹی کمشنر دادو کو ہدایت کی ہے کہ نجی مالکان کو واجبات کی ادائیگی کا عمل فوری تیز کیا جائے۔ دوسری جانب کنٹریکٹر نے تصدیق کی ہے کہ تعمیراتی کام معطل کرنے کی بنیادی وجہ تصدیق شدہ ادائیگیوں کا نہ ملنا ہے، جس کے باعث منصوبہ طویل عرصے سے رکاؤ کا شکار ہے۔
