بہاولپور کے علاقے بستی سکھیل میں ایک دل خراش اور افسوسناک واقعہ سامنے آیا ہے جہاں باپ نے اپنے ہی بیٹے کے ساتھ مل کر شادی کے روز بیٹی کو بے رحمی سے قتل کر دیا۔ پولیس کے مطابق مقتولہ کو پہلے تشدد کا نشانہ بنایا گیا اور پھر قتل کرکے اس کی لاش کھیتوں میں پھینک دی گئی، جس سے علاقے میں خوف اور غم کی فضا پھیل گئی ہے۔
پولیس کا کہنا ہے کہ مقتولہ کو اس کی پھوپھی نے بچپن سے گود لے رکھا تھا اور وہ طویل عرصے سے اسی کے زیرِ کفالت پرورش پا رہی تھی۔ تاہم گزشتہ روز مقتولہ کا باپ اسے اپنے گھر لے گیا جہاں یہ افسوسناک واردات پیش آئی۔ پولیس کے مطابق باپ اور بیٹا مقتولہ کی ہونے والی شادی سے خوش نہیں تھے اور اسی رنجش کی بنیاد پر قتل کا یہ سفاک واقعہ پیش آیا۔
واقعے کی اطلاع ملتے ہی پولیس موقع پر پہنچی، شواہد اکٹھے کیے اور لاش کو پوسٹ مارٹم کے لیے اسپتال منتقل کیا۔ پولیس نے مقدمہ درج کرکے ملزمان کی تلاش شروع کر دی ہے جبکہ علاقے میں خوف و ہراس کے ساتھ غم و غصے کی فضا برقرار ہے۔ اہلِ علاقہ نے مقتولہ کے لیے انصاف اور ملزمان کی جلد گرفتاری کا مطالبہ کیا ہے۔
