آسٹریلیا کی بگ بیش لیگ کی تاریخ میں ایک تاریخی میچ دیکھنے میں آیا، جہاں پہلی بار ایک ہی اننگز میں دو سنچریاں بنیں اور ایک میچ میں سب سے زیادہ چھکوں کا ریکارڈ بھی قائم ہو گیا۔
جمعہ کو کھیلے گئے بگ بیش ٹی ٹوئنٹی لیگ کے اس سنسنی خیز مقابلے میں برسبین ہیٹ نے پرتھ اسکارچرز کو 8 وکٹوں سے شکست دے کر کئی نئے ریکارڈ اپنے نام کر لیے۔ برسبین میں کھیلے گئے میچ میں پہلے بیٹنگ کرتے ہوئے پرتھ اسکارچرز نے مقررہ 20 اوورز میں 6 وکٹوں کے نقصان پر 257 رنز کا بڑا مجموعہ اسکور بورڈ پر سجا دیا۔
پرتھ اسکارچرز کی جانب سے فن ایلن نے جارحانہ بیٹنگ کرتے ہوئے 79 رنز بنائے جبکہ کوپر کونولی نے 77 رنز کی شاندار اننگز کھیلی۔ دونوں بلے بازوں کی بدولت اسکارچرز نے بگ بیش لیگ کی تاریخ کے بڑے اسکورز میں سے ایک اسکور بنایا۔
258 رنز کے ہدف کے تعاقب میں برسبین ہیٹ نے شاندار اور تاریخی بیٹنگ کا مظاہرہ کیا۔ برسبین ہیٹ نے یہ بڑا ہدف میچ کے آخری اوور کی پانچویں گیند پر صرف 2 وکٹوں کے نقصان پر حاصل کر لیا۔ برسبین ہیٹ کی جانب سے جیک ولڈر موتھ 110 رنز کے ساتھ ناقابلِ شکست رہے جبکہ میٹ رنشا نے 102 رنز کی شاندار اننگز کھیلی۔
جیک ولڈر موتھ اور میٹ رنشا کے درمیان 212 رنز کی ریکارڈ شراکت قائم ہوئی جو بگ بیش لیگ کی تاریخ کی سب سے بڑی شراکت داری ہے۔ اسی میچ میں پہلی بار ایک اننگز میں دو سنچریاں بننے کا تاریخی اعزاز بھی حاصل ہوا۔
یہ میچ رنز اور چھکوں کی برسات کے حوالے سے بھی یادگار ثابت ہوا۔ دونوں ٹیموں کے مجموعی طور پر 515 رنز بنے جبکہ ایک میچ میں سب سے زیادہ 36 چھکوں کا نیا ریکارڈ بھی قائم کیا گیا، جو بگ بیش لیگ کی تاریخ میں پہلے کبھی نہیں بنا تھا۔
258 رنز کا ہدف بگ بیش لیگ کی تاریخ کا سب سے بڑا ہدف تھا جو کامیابی سے حاصل کیا گیا، جبکہ ٹی ٹوئنٹی کرکٹ کی تاریخ میں یہ تیسرا سب سے بڑا ہدف ہے جو کسی ٹیم نے حاصل کیا ہو۔ اس تاریخی مقابلے کو بگ بیش لیگ کی یادگار ترین میچز میں شامل کیا جا رہا ہے۔
