محکمہ پاسپورٹ نے درخواستوں کی وصولی، پاسپورٹ پرنٹنگ اور مجموعی کارکردگی کی مؤثر نگرانی کے لیے نیا جدید مانیٹرنگ سسٹم متعارف کرا دیا ہے۔
محکمہ پاسپورٹ کی جانب سے جاری اعلامیے کے مطابق ڈی جی پاسپورٹس کے احکامات پر ہیڈکوارٹرز میں ایک خصوصی 24/7 مانیٹرنگ روم قائم کر دیا گیا ہے، جہاں ڈیجیٹل انٹیگریٹڈ ڈیش بورڈ کے ذریعے روزانہ کی بنیاد پر تمام آپریشنز کی مانیٹرنگ اور ایویلیوایشن کی جائے گی۔ اس نظام کے تحت ملک بھر کے پاسپورٹ دفاتر کی کارکردگی کو براہِ راست مانیٹر کیا جا سکے گا۔
اعلامیے میں بتایا گیا ہے کہ نئے سسٹم کے ذریعے پاسپورٹ درخواستوں کی وصولی سے لے کر ڈیلیوری تک تمام مراحل کی ریئل ٹائم نگرانی ممکن ہو گی۔ شہری کی جانب سے پاسپورٹ اپلائی کرنے کے بعد اس کی پرنٹنگ، پراسیسنگ اور ترسیل کے ہر مرحلے پر نظر رکھی جائے گی تاکہ غیر ضروری تاخیر اور شکایات کا بروقت ازالہ کیا جا سکے۔
محکمہ پاسپورٹ کے مطابق جدید مانیٹرنگ سسٹم کے تحت پاسپورٹ دفاتر میں شہریوں کے رش کی خودکار نشاندہی بھی کی جا سکے گی۔ اس کے علاوہ اسٹاف کی کارکردگی، پاسپورٹ پرنٹنگ کے عمل اور دفاتر میں دستیاب مشینری کی صورتحال کی نگرانی بھی اسی نظام کے ذریعے کی جائے گی۔ نیٹ ورک مینجمنٹ سسٹم کے تحت بیک لاگ کیسز اور مشینری اسٹیٹس کو بھی مسلسل مانیٹر کیا جائے گا۔
ڈی جی پاسپورٹس مصطفیٰ جمال قاضی کا کہنا ہے کہ جدید مانیٹرنگ نظام سے محکمہ پاسپورٹس کی مجموعی کارکردگی میں نمایاں بہتری آئے گی۔ ان کے مطابق افسران اور عملے کی کارکردگی، شہریوں کے رش اور دیگر انتظامی مسائل کی بروقت نشاندہی کے بعد فوری حل کو یقینی بنایا جائے گا۔ ڈی جی پاسپورٹس نے کہا کہ اس نظام کا مقصد شہریوں کو بہتر، تیز اور شفاف پاسپورٹ سہولیات فراہم کرنا ہے۔