انڈر 19 ایشیا کپ کے فائنل میں بھارت کو بدترین شکست کے بعد انڈر 19 کرکٹ ٹیم کے مینٹور اور سابق قومی کپتان سرفراز احمد کی انسٹا اسٹوری سوشل میڈیا پر وائرل ہوگئی ہے۔
اتوار کو دبئی میں کھیلے گئے ایشین کرکٹ کونسل (اے سی سی) انڈر 19 ایشیا کپ کے فائنل میں پاکستان نے سمیر منہاس کی شاندار بیٹنگ کی بدولت بھارت کو 191 رنز کے بھاری مارجن سے شکست دے کر ٹرافی اپنے نام کی۔
پاکستان واپسی پر انڈر 19 کرکٹ ٹیم نے وزیر اعظم شہباز شریف اور بعد ازاں چیف آف ڈیفنس فورسز فیلڈ مارشل سید عاصم منیر سے ملاقات کی۔ اس موقع پر ٹیم کی تاریخی کامیابی کو سراہا گیا اور کھلاڑیوں کی کارکردگی کی تعریف کی گئی۔
بعد ازاں منگل کے روز سرفراز احمد نے فیلڈ مارشل سید عاصم منیر سے ہاتھ ملاتے ہوئے اپنی تصویر انسٹاگرام پر شیئر کی، جس کے ساتھ انہوں نے لکھا کہ
“اسلام و علیکم سر، سرفراز احمد رپورٹنگ، مشن مکمل ہوا”
سرفراز احمد کی یہ انسٹا اسٹوری دیکھتے ہی دیکھتے سوشل میڈیا پر وائرل ہو گئی، جہاں صارفین نے اسے بھارت کے خلاف تاریخی فتح سے جوڑتے ہوئے دلچسپ تبصرے کیے اور سرفراز احمد کے انداز کو خوب سراہا۔
