اسلام آباد: وفاقی وزیر داخلہ محسن نقوی نے قائد اعظم محمد علی جناح کی زندگی کو قانون کی بالادستی اور حق گوئی کی روشن مثال قرار دیتے ہوئے انہیں خراج عقیدت پیش کیا۔
بانی پاکستان کے یوم پیدائش کے موقع پر وفاقی وزیر نے کہا کہ قائد اعظم نے اصول پسندی، دیانت اور بے مثال جدوجہد کے ذریعے تاریخ کا رخ موڑ دیا۔ انہوں نے برصغیر کے مسلمانوں کے سیاسی، سماجی اور معاشی حقوق کے تحفظ کے لیے قائدِ اعظم کی جدوجہد کو سلام پیش کیا اور کہا کہ قائد اعظم نے ناقابل یقین محنت اور غیر متزلزل عزم سے قیام پاکستان کی تحریک کو منظم کیا۔
محسن نقوی نے کہا کہ قائداعظم نے مسلمانوں کو ایک پلیٹ فارم پر اکٹھا کیا اور آزاد مسلم ریاست کے خواب کو حقیقت میں بدلا۔ انہوں نے بتایا کہ قائد اعظم نے ریاست کو قانون، مساوات اور مذہبی آزادی کی بنیادوں پر استوار کرنے کا واضح وژن دیا۔ وفاقی وزیر نے یہ بھی کہا کہ قائد اعظم نے اقلیتوں کے حقوق پر خاص زور دیا اور ان کے اصول آج بھی ترقی، ایمانداری، خود احتسابی اور قومی یکجہتی کے لیے رہنمائی فراہم کرتے ہیں۔
وفاقی وزیر نے کہا کہ آج ہم اس عہد کی تجدید کرتے ہیں کہ قائدِ اعظم کے سنہرے اصولوں یعنی ایمان، اتحاد اور تنظیم کو زندگی کا محور بنائیں گے، کیونکہ پائیدار ترقی و خوشحالی انہی اصولوں پر عمل کرنے سے حاصل کی جا سکتی ہے۔
کرسمس کی مناسبت سے وفاقی وزیر داخلہ نے مسیحی برادری کو مبارکباد پیش کی اور کہا کہ یہ دن محبت، قربانی، بھائی چارے اور امن کے پیغام کی یاد دہانی ہے۔ انہوں نے کہا کہ حضرت عیسیٰ علیہ السلام کی تعلیمات انسانیت، رواداری اور ہمدردی کی اعلی اقدار کی تبلیغ کرتی ہیں، اور مسیحی برادری کو اپنی مذہبی و ثقافتی رسومات آزادی اور جوش و جذبے سے منانے کا مکمل حق حاصل ہے۔
محسن نقوی نے کہا کہ پاکستان کی مسیحی برادری نے ہمیشہ قانون کی پاسداری اور قومی یکجہتی کو فروغ دیا ہے اور مشکل وقت میں ملک کے ساتھ وفاداری، قربانی اور خدمت کی اعلی مثالیں قائم کی ہیں۔ انہوں نے واضح کیا کہ اقلیتوں کے حقوق کا تحفظ حکومت کا فرض ہے اور آئین ان کے حقوق کی ضمانت دیتا ہے۔
وفاقی وزیر نے مزید کہا کہ مذہبی ہم آہنگی اور باہمی احترام کا فروغ ہی مضبوط اور ترقی یافتہ پاکستان کی بنیاد ہے، اور ہر مذہب کے ماننے والے کو مساوی عزت، تحفظ اور یکساں مواقع میسر ہوں گے۔