وزیراعظم شہباز شریف کی دعوت پر متحدہ عرب امارات کے صدر شیخ محمد بن زاید النہیان آج سرکاری دورے پر پاکستان پہنچیں گے۔ اس دورے کو دونوں ممالک کے درمیان تعلقات کو مزید مضبوط بنانے کے لیے اہم قرار دیا جا رہا ہے۔
معزز مہمان کے دورے کے دوران صدرِ مملکت آصف علی زرداری اور وزیراعظم شہباز شریف سمیت اعلیٰ حکومتی شخصیات سے ملاقاتیں شیڈول ہیں، جن میں دوطرفہ امور اور باہمی دلچسپی کے مختلف شعبوں پر تبادلہ خیال کیا جائے گا۔
ترجمان دفتر خارجہ کے مطابق یو اے ای کے صدر کا یہ دورہ دوطرفہ تجارت، سرمایہ کاری، توانائی اور ترقی سمیت مختلف شعبوں میں تعاون بڑھانے میں مددگار ثابت ہوگا، جبکہ دونوں ممالک کے درمیان موجودہ شراکت داری کو مزید وسعت دینے کے امکانات پر بھی غور کیا جائے گا۔
صدر متحدہ عرب امارات کے دورہ پاکستان کے تناظر میں وفاقی دارالحکومت اسلام آباد میں عام تعطیل کا اعلان کر دیا گیا ہے۔ اس فیصلے کے تحت اسلام آباد کی حدود میں واقع پاکستان سیکرٹریٹ اور تمام وفاقی ادارے بند رہیں گے۔
اس کے علاوہ سینیٹ سیکرٹریٹ اور قومی اسمبلی سیکرٹریٹ بھی آج بند رہیں گے۔ اسلام آباد ہائیکورٹ نے بھی آج چھٹی کا اعلان کیا ہے۔ رجسٹرار اسلام آباد ہائیکورٹ کے جاری کردہ نوٹیفکیشن کے مطابق اسلام آباد ہائیکورٹ اور اسلام آباد ڈسٹرکٹ کورٹس 26 دسمبر کو بند رہیں گی۔
وفاقی آئینی عدالت کے رجسٹرار نے بھی آج کی کاز لسٹ منسوخ کرتے ہوئے عام تعطیل کا باقاعدہ نوٹیفکیشن جاری کر دیا ہے۔
کابینہ ڈویژن کی جانب سے جاری کردہ نوٹیفکیشن کے مطابق آج اسلام آباد کے اسپتال، بینک، ضروری سروسز کے دفاتر، میٹرو پولیٹن کارپوریشن، سی ڈی اے دفاتر، اسلام آباد انتظامیہ، پولیس، آئیسکو اور سوئی ناردرن گیس کے دفاتر معمول کے مطابق کھلے رہیں گے تاکہ شہریوں کو بنیادی سہولیات کی فراہمی میں کوئی تعطل نہ آئے۔
