پاکستان کرکٹ بورڈ (پی سی بی) نے سری لنکا کے ساتھ 3 میچز کی ٹی ٹوئنٹی انٹرنیشنل سیریز کے لیے 15 رکنی قومی اسکواڈ کا اعلان کر دیا ہے۔ اس موقع پر سلمان علی آغا کو کپتانی کی ذمہ داری سونپی گئی ہے، جبکہ وکٹ کیپر بلے باز خواجہ محمد نافع کو پہلی بار ٹی ٹوئنٹی اسکواڈ میں شامل کیا گیا ہے۔ شاداب خان بھی کندھے کی سرجری کے بعد اسکواڈ میں واپس آئے ہیں۔
قومی اسکواڈ میں شامل کھلاڑیوں میں سلمان علی آغا، عبدالصمد، ابرار احمد، فہیم اشرف، فخر زمان، خواجہ محمد نافع، محمد نواز، محمد سلمان مرزا، محمد وسیم جونیئر، نسیم شاہ، صاحبزادہ فرحان، صائم ایوب، شاداب خان، عثمان خان اور عثمان طارق شامل ہیں۔
خیال رہے کہ موجودہ اسکواڈ میں بابر اعظم اور شاہین آفریدی شامل نہیں ہیں، جبکہ حارث رؤف کو ایک بار پھر اسکواڈ میں شامل نہیں کیا گیا۔
پاکستان کی کرکٹ ٹیم 4 اور 5 جنوری 2026 کو مرحلہ وار سری لنکا کے لیے روانہ ہوگی۔ پاکستان اور سری لنکا کے درمیان تین ٹی ٹوئنٹی میچز 7، 9 اور 11 جنوری کو دمبولا میں کھیلے جائیں گے۔ یہ سیریز آنے والے ورلڈ کپ اسکواڈ کے انتخاب میں اہم کردار ادا کرے گی۔
دوسری جانب پی سی بی نے ٹیم مینجمنٹ بھی فائنل کر دی ہے۔ نوید اکرم چیمہ سری لنکا کے خلاف سیریز میں ٹیم منیجر کے فرائض انجام دیں گے۔ مائیک ہیسن وائٹ بال کے ہیڈ کوچ، ایشلے نوفکی بولنگ کوچ، محمد حنیف ملک بیٹنگ کوچ، اور شین مکڈرموٹ فیلڈنگ کوچ ہوں گے۔ فزیوتھراپسٹ کے فرائض کلف ڈیکن انجام دیں گے، گرانٹ لوڈن اسٹرینتھ اینڈ کنڈیشننگ کوچ ہوں گے، طلحہ اعجاز ٹیم اینالسٹ کے فرائض انجام دیں گے اور سید نعیم احمد ٹیم کے میڈیا منیجر ہوں گے۔
