پاکستان کی ٹیسٹ ٹیم کے کپتان شان مسعود نے فرسٹ کلاس کرکٹ میں نیا قومی ریکارڈ قائم کر دیا ہے۔ شان مسعود نے پاکستان کی تاریخ میں تیز ترین فرسٹ کلاس ڈبل سنچری بنانے کا اعزاز حاصل کیا۔
انہوں نے ایس این جی پی ایل کی جانب سے کھیلتے ہوئے ساحر ایسوسی ایٹس کے خلاف صرف 177 گیندوں پر ڈبل سنچری مکمل کی، اور تیز ترین فرسٹ کلاس ڈبل سنچری بنانے والے پاکستانی بیٹر بن گئے۔ اس سے قبل یہ ریکارڈ انضمام الحق کے پاس تھا، جنہوں نے 1992 میں آکسفورڈ اینڈ کیمبرج یونیورسٹی کے خلاف 188 گیندوں پر ڈبل سنچری بنائی تھی۔
شان مسعود کی یہ ڈبل سنچری نہ صرف قومی بلکہ پاکستانی سرزمین پر بھی تیز ترین فرسٹ کلاس ڈبل سنچری ہے۔ اس موقع پر بھارت کے وریندر سہواگ نے 2006 کے لاہور ٹیسٹ میں 182 گیندوں پر ڈبل سنچری بنائی تھی۔
شان مسعود پہلے دن کے اختتام پر 185 گیندوں پر 212 رنز بنا کر ناٹ آؤٹ ہیں، اور اپنی ٹیم کے لیے مضبوط بنیاد رکھ چکے ہیں۔
