معاملات اس وقت تلخ ہوئے جب ایک تیسری شخصیت ہمارے درمیان آئی: اہلیہ عماد وسیم

سابق قومی کرکٹر عماد وسیم کی اہلیہ ثانیہ اشفاق نے شوہر سے تعلق کے حوالے سے بیان جاری کر دیا

سابق قومی کرکٹر عماد وسیم کی اہلیہ ثانیہ اشفاق نے اپنے سوشل میڈیا اکاؤنٹ پر ایک پوسٹ شیئر کرتے ہوئے کہا کہ "میرا گھر اجاڑا گیا، میرے بچے اپنے والد سے محروم ہوئے اور پانچ ماہ کے بچے کو اس کے والد نے اب تک نہیں تھاما۔”

ثانیہ اشفاق نے مزید کہا کہ شادی کے دوران کچھ مشکلات رہیں مگر تعلق قائم رہا، اور بطور بیوی اور ماں وہ رشتے کو نبھانے کی پوری کوشش کرتی رہیں۔ تاہم معاملات اس وقت تلخ ہوئے جب ایک تیسری شخصیت ان کے درمیان آئی۔

ثانیہ نے کہا کہ وہ خاتون میرے شوہر سے شادی کی خواہشمند تھی، بچوں کے مستقبل اور گھر کے وقار کی خاطر انہوں نے ذہنی اذیت اور تلخ رویہ برداشت کیا۔ انہوں نے واضح کیا کہ جو لوگ انہیں خاموش رہنے کا کہہ رہے ہیں، ان سے کہیں کہ انصاف ضرور ہوگا اور اس پورے معاملے میں ہر بات کا دستاویزی ثبوت موجود ہے۔

ذرائع کے مطابق عماد وسیم نے اہلیہ سے علیحدگی کے لیے کیس دائر کر دیا ہے۔ ثانیہ اشفاق نے کہا کہ جو دھمکی دے رہے ہیں کہ دستاویزات پبلک نہ کی جائیں، ان سے قانونی طور پر نمٹا جائے گا، اور وہ بدلے کے لیے نہیں بلکہ اپنے اور بچوں کے حق میں سچ بول رہی ہیں، اور ہر اس خاتون کے لیے بھی بول رہی ہیں جسے خاموش کر دیا جاتا ہے۔

خیال رہے کہ اس سے قبل عماد وسیم نے کہا تھا کہ کافی سوچ بچار کے بعد طلاق کے لیے کیس دائر کیا گیا، کیونکہ چند برسوں سے اختلافات حل نہ ہوسکے۔ عماد وسیم نے 2019 میں ثانیہ اشفاق سے شادی کی تھی اور دونوں کے تین بچے ہیں۔