یکم جنوری 2026 سے صارفین کو پیٹرول پمپوں پر بڑا ریلیف ملنے کا امکان ہے۔
حکام نے بین الاقوامی منڈی میں خام تیل کی قیمتوں میں نمایاں کمی کے پیش نظر آئندہ 15 روز کے لیے پیٹرولیم مصنوعات کی قیمتوں میں بڑی کمی کا منصوبہ تیار کر لیا ہے۔
سرکاری ذرائع کے مطابق پیٹرول کی قیمت میں 10.60 روپے فی لیٹر تک کمی متوقع ہے، جبکہ ہائی اسپیڈ ڈیزل کی قیمت میں 8.59 روپے فی لیٹر تک کمی دیکھی جا سکتی ہے۔
ذرائع کا کہنا ہے کہ مٹی کا تیل 8.92 روپے فی لیٹر سستا ہونے کا امکان ہے، جبکہ لائٹ ڈیزل آئل کی قیمت میں 6.62 روپے فی لیٹر کمی متوقع ہے۔
اگر اس تجویز کی منظوری دے دی گئی تو پیٹرول کی قیمت موجودہ 263.45 روپے فی لیٹر سے کم ہو کر تقریباً 252.85 روپے فی لیٹر ہو جائے گی، جبکہ ہائی اسپیڈ ڈیزل کی قیمت 265.65 روپے سے کم ہو کر 257.06 روپے فی لیٹر تک آنے کا امکان ہے۔
اسی طرح مٹی کے تیل کی قیمت بھی موجودہ 180.54 روپے فی لیٹر کے مقابلے میں کم ہو کر 171.62 روپے فی لیٹر تک آنے کی توقع ہے۔
