اسلام آباد: نادرا نے چہرے کی شناخت پر مبنی بائیومیٹرک تصدیقی سہولت کا آغاز کر دیا ہے، جس سے بزرگ شہریوں اور ایسے افراد جنہیں طبی مسائل کی وجہ سے فنگر پرنٹس کی تصدیق میں دشواری ہوتی تھی، آسانی ہوگی۔
نادرا کے جاری اعلامیے کے مطابق وزیراعظم اور وزیر داخلہ کی ہدایت پر کئی اقدامات کیے گئے ہیں اور قومی شناختی کارڈ قوانین میں ترمیم کر کے بائیومیٹرک کی تعریف وسیع کر دی گئی ہے۔ اب شہری چہرے کی شناخت کے ذریعے بھی بائیومیٹرک تصدیق کروا سکیں گے، جبکہ یہ سہولت پاک آئی موبائل ایپ پر بھی دستیاب ہوگی۔
20 جنوری سے نادرا مراکز میں چہرے کی شناخت پر مبنی بائیومیٹرک تصدیقی سرٹیفکیٹ کا اجرا کیا جائے گا۔ شہری ضرورت پڑنے پر معمولی فیس کے عوض یہ سرٹیفکیٹ حاصل کر سکیں گے۔ فنگر پرنٹس کی تصدیق نہ ہونے کی صورت میں شہری قریبی نادرا رجسٹریشن مرکز جائیں گے، جہاں چہرے کی شناخت کی کارروائی مکمل ہونے پر سرٹیفکیٹ جاری کیا جائے گا۔ اس سرٹیفکیٹ پر تصویر، شناختی کارڈ نمبر، نام، ولدیت، منفرد ٹریکنگ آئی ڈی اور کیو آر کوڈ شامل ہوگا اور یہ سرٹیفکیٹ سات دن کے لیے قابلِ استعمال ہوگا۔
اعلامیے کے مطابق نادرا اس نظام کے نفاذ کے لیے مکمل تیار ہے اور متعلقہ سرکاری و نجی اداروں سے ضروری اقدامات کی درخواست کر دی گئی ہے۔ 20 جنوری کے بعد اس سہولت کی دستیابی سے متعلق کسی بھی شکایت کی صورت میں متعلقہ ادارے یا محکمے سے رابطہ کیا جا سکتا ہے۔ ڈیجیٹل آئی ڈی کے اجرا کے بعد یہ سہولت پاک آئی ڈی موبائل ایپ پر بھی دستیاب ہو جائے گی۔
