سابق سربراہ پاک فضائیہ ائیر مارشل نور خان کی بیٹی ڈاکٹر فائقہ نور خان امریکا میں ایک المناک ٹریفک حادثے میں جاں بحق ہو گئیں۔
امریکی میڈیا کے مطابق یہ حادثہ ریاست ورجینیا کی کاؤنٹی ڈینوڈی میں پیش آیا، جہاں ڈاکٹر فائقہ قریشی کی کار روڈ سے ٹکرانے کے بعد آگ پکڑ گئی اور وہ موقع پر ہی جاں بحق ہو گئیں۔ ان کی عمر 75 سال تھی۔
ڈاکٹر فائقہ قریشی نے 1993 میں بچوں کے کنگز ڈاٹر اسپتال میں فزیشن کے طور پر خدمات شروع کیں اور بعد ازاں طویل عرصے تک ایمرجنسی ڈپارٹمنٹ کی میڈیکل ڈائریکٹر کے طور پر کام کیا۔ اسپتال نے ان کے بچوں اور خاندانوں کے ساتھ لگاؤ اور آنے والے ڈاکٹرز کی تربیت میں کردار کو دور رس اثرات رکھنے والا قرار دیا۔
مزید براں، کنگز ایڈورڈ میڈیکل یونیورسٹی لاہور نے بھی سوشل میڈیا پر ڈاکٹر فائقہ کے انتقال پر افسوس کا اظہار کرتے ہوئے کہا کہ وہ یونیورسٹی کی ہونہار طالبہ رہ چکی تھیں اور 1973 میں گریجویٹ ہونے کے بعد بطور استاد بھی خدمات انجام دیتی رہیں۔
ڈاکٹر فائقہ قریشی کا شمار میڈیکل کے شعبے میں پاکستان کی قابلِ احترام شخصیات میں ہوتا تھا، اور ان کے علم و خدمت کا اثر بہت سے مریضوں اور طلبہ پر قائم رہے گا۔
