وفاقی کابینہ نے اسلام آباد میں بلدیاتی انتخابات پھر ملتوی کرنے کی منظوری دے دی
اسلام آباد: وفاقی کابینہ نے اسلام آباد میں شیڈول بلدیاتی انتخابات کو دوبارہ ملتوی کرنے کی منظوری دے دی ہے۔ اس فیصلے کا اعلان وزیراعظم شہباز شریف کی زیر صدارت وفاقی کابینہ کے مختصر اجلاس کے بعد کیا گیا۔
ذرائع کے مطابق اجلاس میں کابینہ کمیٹی برائے قانون سازی کے 3 دسمبر اور 30 دسمبر کے اجلاسوں کے فیصلوں کی توثیق بھی کی گئی۔ اجلاس میں وفاقی دارالحکومت میں بلدیاتی انتخابات سے متعلق نئی قانون سازی پر غور کیا گیا، جبکہ چیف کمشنر اسلام آباد نے وفاقی کابینہ کو بلدیاتی انتخابات کے حوالے سے تفصیلی بریفنگ دی۔
ذرائع کا کہنا ہے کہ بریفنگ کے بعد وفاقی کابینہ نے اسلام آباد میں بلدیاتی انتخابات ملتوی کرنے کی منظوری دی اور ساتھ ہی پنجاب طرز کے بلدیاتی انتخابات کی قانون سازی کی بھی منظوری دی گئی۔
یاد رہے کہ الیکشن کمیشن نے اسلام آباد کے بلدیاتی انتخابات کے لیے 15 فروری کی تاریخ مقرر کی تھی، جبکہ 16 فروری سے 19 فروری تک نتائج مرتب کیے جانے تھے۔
