خوشی مکھرجی کا وضاحتی بیان: سوریا کمار یادیو سے کوئی رومانوی تعلق نہیں
ممبئی: رئیلیٹی شو "ایم ٹی وی اسپلٹس وِلا” سے شہرت حاصل کرنے والی بالی وڈ اداکارہ خوشی مکھرجی نے ٹی ٹوئنٹی کرکٹ ٹیم کے کپتان سوریا کمار یادیو کے حوالے سے دیے گئے اپنے بیان کی وضاحت پیش کی ہے۔
خوشی مکھرجی نے کہا کہ سوریا کمار یادیو سے میرا کوئی رومانوی تعلق نہیں تھا اور میرے بیان کو غلط تناظر میں پیش کیا گیا۔ انہوں نے مزید کہا کہ ان کے انسٹاگرام اکاؤنٹ کو ہیک بھی کیا گیا تھا، جس کی وجہ سے بعض پیغامات غلط فہمی کا سبب بنے۔
اداکارہ نے بتایا کہ اس سے قبل ایک تقریب میں انہوں نے کہا تھا کہ میرے پیچھے بہت سے کرکٹرز ہیں لیکن میں کسی کرکٹر کو ڈیٹ نہیں کرنا چاہتی، اور سوریا کمار یادیو بھی ان میں شامل تھے۔ خوشی مکھرجی کے مطابق سوریا انہیں اکثر میسجز کیا کرتے تھے، لیکن اب ہمارا زیادہ رابطہ نہیں ہے۔
دوسری جانب، سوریا کمار یادیو کی جانب سے اب تک اس بیان پر کوئی جواب موصول نہیں ہوا ہے۔
