عوامی مسلم لیگ کے سربراہ شیخ رشید نے چیف جسٹس سے 9 مئی کے کیسز میں اپیلوں کو جلد سننے کی درخواست کر دی ہے۔
راولپنڈی کی انسدادِ دہشت گردی عدالت میں جی ایچ کیو حملہ کیس سمیت 9 مئی کے 12 مقدمات کی سماعت ہوئی۔ سماعت کے بعد عدالت کے باہر میڈیا سے گفتگو کرتے ہوئے شیخ رشید نے کہا کہ 9 مئی کے دن وہ پاکستان میں موجود نہیں تھے، تاہم کیس تو کیس ہوتا ہے اور اس کا فیصلہ قانونی طریقے سے ہونا چاہیے۔
شیخ رشید نے چیف جسٹس سے دردمندانہ اپیل کرتے ہوئے کہا کہ ملک میں غریب آدمی شدید مشکلات کا شکار ہے، مہنگائی اور بے روزگاری کی وجہ سے لوگوں کے گھروں کے چولہے نہیں جل رہے۔ ان کا کہنا تھا کہ عوام پہلے ہی معاشی دباؤ میں ہیں اور مقدمات کے طویل التوا نے مشکلات میں مزید اضافہ کر دیا ہے۔
انہوں نے مزید کہا کہ چیف جسٹس سے گزارش ہے کہ 9 مئی کے کیسز میں اپیلوں کو سننے میں بہت تاخیر ہو چکی ہے، اس لیے براہِ کرم ان اپیلوں کو سنا جائے تاکہ مقدمات کے فیصلے ہو سکیں اور لوگوں کو انصاف ملے۔
شیخ رشید کا کہنا تھا کہ انصاف میں تاخیر، انصاف سے انکار کے مترادف ہے، اور عدلیہ سے عوام کی توقع ہے کہ وہ جلد از جلد ان معاملات کو نمٹائے گی۔
