سیہون: گاؤں جان محمد بھٹی میں ملزمان نے گھر میں گھس کر تین خواتین کو اغوا کر لیا، جس کے بعد علاقے میں کشیدگی پیدا ہو گئی ہے۔
ایس ایس پی ظفر صدی کے مطابق واقعہ اسی گاؤں میں پیش آیا جہاں ملزمان نے گھروں میں داخل ہو کر تین خواتین کو اغوا کیا۔ انہوں نے بتایا کہ اس سلسلے میں 20 افراد کے خلاف دہشتگردی ایکٹ کے تحت مقدمہ درج کیا گیا ہے اور واقعے میں ملوث دو افراد کو گرفتار کر لیا گیا ہے۔
ایس ایس پی کے مطابق کچھ عرصہ قبل ایک نوجوان نے مخالف برادری کی لڑکی سے پسند کی شادی کی تھی، جس پر دونوں برادریوں کے درمیان تنازع پیدا ہوا۔ اسی تنازع کے نتیجے میں ملزمان نے گھروں میں داخل ہو کر تینوں خواتین کو اغوا کیا۔
مزید بتایا گیا کہ مغوی خواتین کی بازیابی کے لیے پولیس چھاپے مار رہی ہے، اور اس دوران فائرنگ کے تبادلے میں دو افراد زخمی بھی ہوئے ہیں۔ حکام نے کارروائی جاری رکھنے اور تمام مغوی خواتین کو محفوظ واپس لانے کا عزم ظاہر کیا ہے۔
