پاک فضائیہ نے مقامی طور پر تیار کردہ تیمور ویپن سسٹم کا کامیاب فلائٹ ٹیسٹ کر کے قومی دفاعی صلاحیت میں نمایاں اضافہ کر دیا ہے۔
آئی ایس پی آر کے مطابق تیمور ائیر لانچڈ کروز میزائل 600 کلومیٹر تک زمینی اور بحری اہداف کو نشانہ بنانے کی صلاحیت رکھتا ہے۔ اس میزائل میں کم بلندی پر پرواز کرنے کی خصوصیت موجود ہے جو دشمن کے ائیر اور میزائل ڈیفنس سسٹمز کو چکمہ دینے میں مؤثر ثابت ہوتی ہے۔ تیمور کروز میزائل جدید نیوی گیشن اور گائیڈنس سسٹم سے بھی لیس ہے، جو نشانے تک درست اور مؤثر رسائی کو یقینی بناتا ہے۔
آئی ایس پی آر نے بتایا کہ تیمور میزائل کی کامیاب تجربے سے پاک فضائیہ کی روایتی دفاعی صلاحیت میں اضافہ ہوا ہے اور یہ علاقائی سکیورٹی ماحول میں پاکستان کے قابلِ اعتماد دفاع کو مضبوط بناتا ہے۔ مزید برآں، یہ کامیابی قومی سلامتی کے اہداف کے حصول، قومی عزم اور تکنیکی خود کفالت کا واضح ثبوت ہے۔
فلائٹ ٹیسٹ کے موقع پر پاک افواج کے سینئر افسران اور سائنسدان موجود تھے، جبکہ ائیر چیف مارشل ظہیر احمد بابر سدھو نے ٹیم کے سائنسدانوں اور انجنیئرز کو کامیاب تجربے پر مبارکباد دی۔
دوسری جانب صدرِ مملکت نے پاک فضائیہ کی جانب سے تیمور ویپن سسٹم کے کامیاب تجربے پر خراجِ تحسین پیش کیا اور کہا کہ مقامی سطح پر جدید ہتھیاروں کی تیاری قومی صلاحیت، عزم اور ادارہ جاتی مہارت کی عکاس ہے۔ صدر نے مزید کہا کہ یہ کامیابی قومی دفاع میں خود انحصاری کے سفر میں ایک اہم پیشرفت ہے اور دفاعی شعبے میں جدید ٹیکنالوجی کا فروغ پاکستان کی سلامتی اور خودمختاری کے تحفظ کے عزم کا مظہر ہے۔
