متحدہ قومی موومنٹ (ایم کیو ایم) پاکستان نے کراچی بچاؤ مہم شروع کرنے کا اعلان کر دیا ہے۔ بہادرآباد میں ایم کیو ایم پاکستان کے مرکز پر پریس کانفرنس کرتے ہوئے سینئر رہنما ڈاکٹر فاروق ستار نے کہا کہ نیا سال بہت سی توقعات اور امیدیں لے کر آیا ہے، اور ملک ایک اہم دوراہے پر کھڑا ہے جہاں قومی یکجہتی اور ترقی کی ضرورت پہلے سے کہیں زیادہ ہے۔
ڈاکٹر فاروق ستار نے کہا کہ پاکستان نے حالیہ عرصے میں ایک تاریخی معرکہ سر کیا ہے اور 6 سے 10 مئی کے دن ہماری تاریخ میں سنگِ میل کی حیثیت رکھتے ہیں۔ ان کا کہنا تھا کہ اس کامیابی کا مکمل کریڈٹ فیلڈ مارشل، افواجِ پاکستان اور حکومت کو جاتا ہے، جبکہ اس دوران عوام بھی افواجِ پاکستان کے ساتھ سیسہ پلائی ہوئی دیوار بن کر کھڑے رہے۔ انہوں نے کہا کہ قومی اتحاد ہی پاکستان کی اصل طاقت ہے۔
فاروق ستار کا کہنا تھا کہ اب 2026 میں معرکہ معیشت کی طرف بڑھنا ہوگا، کیونکہ ملکی سلامتی کے ساتھ ساتھ معاشی استحکام بھی وقت کی سب سے بڑی ضرورت ہے۔ انہوں نے کہا کہ اگر پاکستان کو مضبوط اور مستحکم بنانا ہے تو معیشت کی بحالی ناگزیر ہے، اور اس میں تمام سیاسی قوتوں کو اپنا کردار ادا کرنا ہوگا۔
انہوں نے واضح کیا کہ ملک کی بقا اور سلامتی کا براہِ راست تعلق کراچی سے ہے۔ ان کا کہنا تھا کہ اگر ملک کو بچانا ہے تو کراچی کو بچانا ہوگا، کیونکہ کراچی پاکستان کی معاشی شہ رگ ہے۔ انہوں نے کہا کہ کراچی کو مسلسل نظرانداز کیا گیا، جس کے باعث شہر کے بنیادی مسائل سنگین صورت اختیار کر چکے ہیں۔
ڈاکٹر فاروق ستار نے بتایا کہ ایم کیو ایم پاکستان کراچی بچاؤ مہم کے ذریعے اپنا بھرپور کردار ادا کرے گی۔ اس مہم کے تحت ایم کیو ایم کے وفود کراچی میں مختلف سیاسی جماعتوں، وکلا، تاجروں، صنعتکاروں اور زندگی کے مختلف شعبوں سے تعلق رکھنے والے افراد سے ملاقاتیں کریں گے۔ ان ملاقاتوں میں کراچی کے مسائل، وسائل کی منصفانہ تقسیم اور شہری حقوق کا مقدمہ تفصیل سے رکھا جائے گا۔
انہوں نے مزید کہا کہ ایم کیو ایم کو اس کے بانی سے الگ کرنے کا فیصلہ کیا گیا تھا اور پارٹی اس فیصلے پر آج بھی قائم ہے۔ فاروق ستار کا کہنا تھا کہ ڈاکٹر عمران فاروق کو لندن میں قتل کیا گیا اور یہ معاملہ دو حکومتوں کے درمیان بھی زیرِ بحث آیا، جس سے ایم کیو ایم کی تاریخ کے کئی تلخ پہلو جڑے ہوئے ہیں۔
پریس کانفرنس میں ڈاکٹر فاروق ستار نے اس عزم کا اظہار کیا کہ ایم کیو ایم کراچی کے مسائل کے حل کے لیے ہر فورم پر آواز بلند کرتی رہے گی اور کراچی کے عوام کو تنہا نہیں چھوڑا جائے گا۔ انہوں نے کہا کہ کراچی کو اس کا جائز حق دلانا ہی ایم کیو ایم پاکستان کی سیاست کا محور ہے۔
