لکی مروت اور بنوں میں الگ الگ فائرنگ کے واقعات میں مجموعی طور پر 4 پولیس اہلکار شہید ہوگئے ہیں۔
لکی مروت پولیس کے ترجمان کے مطابق سرائے نورنگ شہر میں نامعلوم موٹر سائیکل سوار دہشت گردوں نے فائرنگ کی، جس کے نتیجے میں ڈیوٹی پر مامور 3 ٹریفک پولیس اہلکار شہید ہوگئے۔ شہید ہونے والوں میں انچارج ٹریفک پولیس نورنگ جلال خان، کانسٹیبل عزیز اللہ اور کانسٹیبل عبداللہ شامل ہیں۔ پولیس کے مطابق فائرنگ کے بعد حملہ آور فرار ہوگئے اور شہید اہلکاروں کی لاشیں تحصیل ہیڈ کوارٹر اسپتال سرائے نورنگ منتقل کردی گئی ہیں۔
دوسری جانب بنوں پولیس کے مطابق منڈان علاقے میں نامعلوم مسلح افراد کی فائرنگ سے ایک پولیس اہلکار شہید ہوگیا۔ کانسٹیبل رشید خان گھر سے ڈیوٹی کے لیے تھانہ منڈان جا رہے تھے کہ راستے میں مسلح افراد کی فائرنگ سے وہ شہید ہوگئے۔
پولیس حکام نے واقعہ کی تحقیقات شروع کر دی ہیں اور حملہ آوروں کی گرفتاری کے لیے چھاپے اور سرچ آپریشن جاری ہیں۔
