کوئٹہ: بلوچستان کے ضلع کیچ کی تحصیل تربت میں سکیورٹی فورسز نے اسلحہ سمگلنگ کے ایک بڑے نیٹ ورک پر کارروائی کرتے ہوئے غیر قانونی اسلحے کی بڑی کھیپ ضبط کر لی۔
سکیورٹی ذرائع کے مطابق ایم 8 شاہراہ سمی ناکے پر مشتبہ پک اپ کی گاڑی کی تلاشی کے دوران بھاری مقدار میں غیر قانونی اسلحہ برآمد ہوا۔ کارروائی کے دوران سکیورٹی فورسز نے 400 پستول اور 340 میگزین ضبط کیے، جبکہ مشتبہ شخص کو گاڑی سمیت گرفتار کر لیا گیا۔ گرفتار شخص کی شناخت احسن اللہ ولد میر باز خان ساکن پشاور کے طور پر ہوئی ہے۔
سکیورٹی فورسز کے مطابق یہ کارروائی تربت میں اسلحہ سمگلنگ کے نیٹ ورک کو توڑنے اور مقامی سطح پر امن و امان کو یقینی بنانے کے لیے کی گئی۔ حکام نے کہا کہ ملک میں شرپسند عناصر اور غیر قانونی اسلحے کے دھندے کے خاتمے کے لیے فورسز ہر وقت چوکس ہیں اور ایسے نیٹ ورک کے خلاف مؤثر کارروائیاں جاری رکھیں گے۔
سکیورٹی حکام نے عوام سے اپیل کی ہے کہ وہ مشتبہ سرگرمیوں کی اطلاع فورسز کو دیں تاکہ ملک میں امن و امان قائم رہ سکے اور شہری محفوظ رہیں۔
