واشنگٹن/کاراکاس: وینزویلا کے سیاسی بحران اور امریکی فوجی کارروائیوں کے بعد عالمی تیل کی قیمتوں میں کمی دیکھنے میں آئی ہے۔
غیر ملکی خبر رساں ادارے کے مطابق ایشیائی مارکیٹ میں برینٹ خام تیل کی قیمت میں 0.63 فیصد کمی ہوئی ہے اور یہ فی بیرل 60.37 ڈالر میں فروخت ہو رہا ہے۔ اسی طرح ویسٹ ٹیکساس انٹرمیڈیٹ (WTI) خام تیل کی قیمت میں بھی 0.70 فیصد کمی ریکارڈ کی گئی اور یہ فی بیرل 56.92 ڈالر ہو گئی ہے۔
یاد رہے کہ امریکی فوج نے وینزویلا کے دارالحکومت کاراکاس سمیت مختلف مقامات پر کارروائیاں کیں اور صدر نکولس مادورو اور ان کی اہلیہ کو گرفتار کر کے امریکا منتقل کر دیا۔ کارروائی کے دوران کاراکاس میں متعدد دھماکے ہوئے اور شہر کے مختلف علاقوں میں امریکی طیاروں کی نچلی پروازیں دیکھی گئیں، جس سے شہریوں میں خوف و ہراس پھیل گیا۔
امریکی میڈیا کے مطابق امریکی صدر ڈونلڈ ٹرمپ نے وینزویلا میں کارروائی کے احکامات جاری کیے، اور کم از کم سات دھماکے کاراکاس میں ریکارڈ کیے گئے۔ اس سیاسی اور عسکری بحران کے اثرات نے عالمی توانائی مارکیٹ پر بھی اثر ڈالا، جس کے نتیجے میں خام تیل کی قیمتوں میں کمی واقع ہوئی۔
تجزیہ کاروں کا کہنا ہے کہ اگر وینزویلا کی صورتحال مزید کشیدہ رہی تو آئندہ دنوں میں تیل کی قیمتوں میں مزید اتار چڑھاؤ متوقع ہے، کیونکہ ملک کے تیل کے ذخائر اور پیداوار عالمی توانائی مارکیٹ کے لیے اہم ہیں۔
