پشاور: خیبرپختونخوا کے ضلع لکی مروت میں سی ٹی ڈی بنوں ریجن اور پولیس نے مشترکہ انٹیلی جنس بیسڈ کارروائی کرتے ہوئے تین خارجی دہشت گردوں کو ہلاک کر دیا۔
سی ٹی ڈی حکام کے مطابق یہ کارروائی پولیس اسٹیشن نورنگ کی حدود میں خفیہ اطلاع کی بنیاد پر کی گئی۔ کارروائی کے دوران ہلاک ہونے والے دہشت گردوں میں ٹارگٹ کلر محمد عرف مجاہد، خاجی فواد اللہ عرف معاذ اور افنان خان عرف افنانی شامل ہیں۔ حکام کا کہنا ہے کہ یہ تینوں خارجی مختلف سنگین مقدمات میں مطلوب تھے اور طویل عرصے سے قانون نافذ کرنے والے اداروں کو چکمہ دے رہے تھے۔
سی ٹی ڈی کے مطابق ہلاک دہشت گرد پولیس پر حملوں، دہشت گردی، قتل اور اقدامِ قتل جیسے سنگین جرائم میں ملوث تھے۔ ان عناصر کی سرگرمیوں کے باعث لکی مروت اور گردونواح میں امن و امان کو شدید خطرات لاحق تھے، تاہم بروقت کارروائی کے ذریعے ایک بڑے خطرے کو ٹال دیا گیا۔
کارروائی کے دوران دہشت گردوں کے قبضے سے بھاری اسلحہ اور دیگر سامان بھی برآمد کیا گیا۔ سی ٹی ڈی حکام کے مطابق ہلاک خارجیوں سے کلاشنکوف، دو عدد 9 ایم ایم پسٹل، موبائل فونز اور کالعدم تنظیم کے شناختی کارڈز برآمد ہوئے ہیں، جنہیں مزید تفتیش کے لیے تحویل میں لے لیا گیا ہے۔
آئی جی خیبرپختونخوا اور ایڈیشنل آئی جی سی ٹی ڈی نے کامیاب کارروائی پر سی ٹی ڈی بنوں ریجن اور لکی مروت پولیس کی کارکردگی کو سراہتے ہوئے شاباش دی۔ انہوں نے کہا کہ فورسز نے پیشہ ورانہ مہارت اور بہادری کا مظاہرہ کرتے ہوئے عوام کے جان و مال کا تحفظ یقینی بنایا ہے۔
آئی جی خیبرپختونخوا کا کہنا تھا کہ معاشرے کے ناسور دہشت گردوں کے لیے خیبرپختونخوا کی سرزمین تنگ ہو چکی ہے۔ انہوں نے واضح کیا کہ آخری خارجی کے خاتمے تک دہشت گردی کے خلاف کارروائیاں بلا تعطل جاری رہیں گی اور صوبے میں امن و امان ہر صورت برقرار رکھا جائے گا۔
