واشنگٹن: امریکی صدر ڈونلڈ ٹرمپ نے روسی تیل کے معاملے پر تعاون نہ کرنے کی صورت میں بھارت کو ٹیرف بڑھانے کی دھمکی دے دی ہے۔
غیر ملکی خبر رساں ادارے کے مطابق امریکی صدر ڈونلڈ ٹرمپ نے کہا ہے کہ واشنگٹن روسی تیل کے معاملے پر نئی دہلی کے رویے کا باریک بینی سے جائزہ لے رہا ہے۔ ان کا کہنا تھا کہ اگر بھارت روسی تیل کے مسئلے پر امریکا کے ساتھ تعاون نہیں کرتا تو اس پر درآمدی ٹیرف میں اضافہ کیا جا سکتا ہے۔
صدر ٹرمپ کا یہ بیان ایک ایسے وقت میں سامنے آیا ہے جب امریکا اور بھارت کے درمیان تجارتی مذاکرات جاری ہیں اور دونوں ممالک کے تعلقات میں معاشی امور کو مرکزی حیثیت حاصل ہے۔ اس سے قبل بھی امریکی صدر یہ دعویٰ کر چکے ہیں کہ بھارتی وزیر اعظم نریندر مودی نے انہیں یقین دہانی کرائی تھی کہ بھارت روسی تیل کی خریداری بند کر دے گا۔
تاہم قابلِ ذکر بات یہ ہے کہ امریکی صدر کے اس دعوے پر بھارت کی جانب سے اب تک کوئی باضابطہ تصدیق یا تردید سامنے نہیں آئی، جس کے باعث اس معاملے پر ابہام برقرار ہے۔ ماہرین کے مطابق اگر امریکا کی جانب سے ٹیرف بڑھانے کا فیصلہ کیا جاتا ہے تو اس کے اثرات امریکا۔بھارت تجارتی تعلقات اور خطے کی معیشت پر بھی مرتب ہو سکتے ہیں۔
