کراچی: پاکستان اسٹاک ایکسچینج میں زبردست تیزی کا سلسلہ جاری ہے اور 100 انڈیکس ایک لاکھ 81 ہزار کی حد عبور کر گیا ہے۔
کاروباری ہفتے کے پہلے روز پاکستان اسٹاک ایکسچینج میں سرمایہ کاروں کے اعتماد کے باعث کاروبار کا آغاز مثبت رجحان کے ساتھ ہوا۔ مارکیٹ کھلتے ہی خریداری کا دباؤ غالب رہا، جس کے نتیجے میں ایک موقع پر 100 انڈیکس ایک لاکھ 81 ہزار کی نفسیاتی حد عبور کر گیا، جو ملکی تاریخ کی اب تک کی بلند ترین سطح قرار دی جا رہی ہے۔
تفصیلات کے مطابق اس وقت پاکستان اسٹاک ایکسچینج کا 100 انڈیکس 2100 پوائنٹس اضافے کے ساتھ ایک لاکھ 81 ہزار 135 کی سطح پر ٹریڈ کر رہا ہے۔ مارکیٹ میں بڑے شعبوں، خصوصاً بینکنگ، توانائی، آئل اینڈ گیس، سیمنٹ اور ٹیکنالوجی سیکٹر کے شیئرز میں نمایاں خریداری دیکھنے میں آئی، جس نے مجموعی طور پر انڈیکس کو اوپر لے جانے میں اہم کردار ادا کیا۔
مارکیٹ تجزیہ کاروں کے مطابق سرمایہ کاروں کی جانب سے معاشی اشاریوں میں بہتری، آئی ایم ایف سے متعلق مثبت پیش رفت، روپے کی قدر میں استحکام اور مستقبل میں پالیسی ریٹس میں ممکنہ نرمی کی توقعات نے مارکیٹ کے اعتماد کو مضبوط کیا ہے۔ اسی وجہ سے نہ صرف مقامی بلکہ ادارہ جاتی سرمایہ کار بھی بھرپور خریداری کرتے نظر آئے۔
یاد رہے کہ گزشتہ کاروباری ہفتے کے آخری روز بھی مارکیٹ میں غیر معمولی تیزی دیکھنے میں آئی تھی، جب 100 انڈیکس میں 2600 پوائنٹس سے زائد کا اضافہ ریکارڈ کیا گیا تھا اور انڈیکس ایک لاکھ 79 ہزار 34 پوائنٹس پر بند ہوا تھا۔ مسلسل دوسرے ہفتے بھی مارکیٹ میں یہی مثبت رجحان برقرار رہنا سرمایہ کاروں کے اعتماد کی عکاسی کر رہا ہے۔
ماہرین کا کہنا ہے کہ اگر موجودہ معاشی اور پالیسی صورتحال میں بہتری کا سلسلہ جاری رہا تو آنے والے دنوں میں مارکیٹ مزید نئی بلندیوں کو چھو سکتی ہے، تاہم سرمایہ کاروں کو محتاط حکمت عملی اپنانے کا مشورہ بھی دیا جا رہا ہے۔
