لکی مروت: لکی مروت میں نجی سیمنٹ فیکٹری کی بس کے قریب ہونے والے دھماکے میں ایک شخص جاں بحق جبکہ دو خواتین سمیت 8 افراد زخمی ہو گئے، جس کے بعد علاقے میں شدید خوف و ہراس پھیل گیا۔
پولیس کے مطابق واقعہ لکی مروت کے علاقے بیگو خیل میں ناورخیل موڑ کے قریب پیش آیا، جہاں دہشت گردوں نے نجی سیمنٹ فیکٹری کے ملازمین کو لے جانے والی بس کو آئی ای ڈی دھماکے سے نشانہ بنایا۔ دھماکا گاؤں بیگو خیل سے نجی سیمنٹ فیکٹری جانے والی بس کے قریب کیا گیا، جس کے نتیجے میں بس مکمل طور پر تباہ ہو گئی۔
حکام کا کہنا ہے کہ دھماکے کے نتیجے میں سیمنٹ فیکٹری کا ایک ملازم موقع پر ہی جاں بحق ہو گیا، جبکہ 8 افراد زخمی ہوئے۔ زخمیوں میں 2 خواتین اور فیکٹری کے 4 ملازمین شامل ہیں۔ ذرائع کے مطابق کئی زخمیوں کی حالت تشویشناک بتائی جا رہی ہے، جس کے باعث ہلاکتوں میں اضافے کا خدشہ بھی ظاہر کیا جا رہا ہے۔
پولیس کے مطابق تمام زخمیوں کو فوری طور پر طبی امداد کے لیے قریبی ہسپتال منتقل کر دیا گیا، جہاں بعض زخمیوں کو ابتدائی طبی امداد کے بعد تشویشناک حالت کے پیش نظر ڈسٹرکٹ ہیڈ کوارٹر ہسپتال منتقل کیا گیا ہے۔ ہسپتال انتظامیہ کو ہائی الرٹ کر دیا گیا ہے جبکہ اضافی عملہ بھی طلب کر لیا گیا ہے۔
واقعے کے بعد پولیس اور سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ پولیس حکام کا کہنا ہے کہ علاقے میں سکیورٹی مزید سخت کر دی گئی ہے تاکہ کسی بھی ممکنہ خطرے سے نمٹا جا سکے اور دہشت گرد عناصر کو گرفتار کیا جا سکے۔
دوسری جانب لکی مروت میں نجی سیمنٹ فیکٹری کی گاڑی پر ہونے والے دھماکے کی ابتدائی رپورٹ بھی مرتب کر لی گئی ہے۔ رپورٹ کے مطابق واقعہ صبح 6 بج کر 30 منٹ پر پیش آیا، جس میں ایک شخص جاں بحق اور 8 افراد زخمی ہوئے۔ رپورٹ میں بتایا گیا ہے کہ واقعے کا مقدمہ تھانہ سٹی لکی مروت میں درج کیا جائے گا جبکہ شواہد کی روشنی میں مزید قانونی کارروائی عمل میں لائی جائے گی۔
پولیس کا کہنا ہے کہ دھماکے کی نوعیت اور ذمہ داران کا تعین کرنے کے لیے تفتیش جاری ہے، واقعے میں ملوث عناصر کو جلد قانون کے کٹہرے میں لایا جائے گا۔
