وزیر دفاع خواجہ آصف نے کہا ہے کہ بھارت کے خلاف جنگ میں ہمارے جہاز ٹیسٹ ہو چکے ہیں اور معرکۂ حق کے بعد پاکستان کو اتنے آرڈرز مل رہے ہیں کہ چھ ماہ بعد آئی ایم ایف کو خدا حافظ کہنے کی پوزیشن میں ہوں گے۔
جیو نیوز کے پروگرام کیپٹل ٹاک میں گفتگو کرتے ہوئے وزیر دفاع خواجہ آصف نے کہا کہ پاکستان بھارت کے ساتھ ایک اور جنگ کے لیے بھی مکمل طور پر تیار ہے۔ ان کا کہنا تھا کہ پاک بھارت جنگ میں پاکستان کا مؤثر اور بھرپور جواب پوری دنیا نے دیکھا، جس کے بعد نریندر مودی کی نہ ملک کے اندر اور نہ ہی بیرونِ ملک کوئی ساکھ باقی رہی۔
وزیر دفاع نے کہا کہ 2025 میں بھارت کے خلاف جنگ میں کامیابی کے بعد پاکستان کو دفاعی صنعت میں اتنے زیادہ جہازوں کے آرڈرز موصول ہو رہے ہیں کہ آئندہ چھ ماہ میں ملک آئی ایم ایف سے نجات حاصل کرنے کی پوزیشن میں آ سکتا ہے۔
اب بھی بھارت نے جارحیت کی تو ویسے ہی جواب دیا جائے گا: خواجہ آصف
خواجہ آصف کا کہنا تھا کہ پاک بھارت جنگ کے دوران بھارت نے امریکا سے رجوع کیا اور چین سے بھی رابطے کیے، تاہم اس کے باوجود اسے ناکامی کا سامنا کرنا پڑا۔ انہوں نے کہا کہ اگر اب بھی بھارت نے جارحیت کی تو اسے ویسا ہی جواب دیا جائے گا جیسا مئی 2025 کی جنگ میں دیا گیا، جس کے بعد بھارت کا اعتماد بری طرح متاثر ہوا۔
وزیر دفاع نے مزید کہا کہ پاکستانی افواج کی پیشہ ورانہ صلاحیتوں کو پوری دنیا تسلیم کرتی ہے اور مستقبل قریب میں یہ بھی ممکن ہے کہ پاکستان کو آئی ایم ایف کی ضرورت ہی نہ پڑے۔
دعا کریں ترکیہ نیتن یاہو کو اغوا کرلے: وزیر دفاع
اس موقع پر وزیر دفاع خواجہ آصف نے کہا کہ اگر امریکا واقعی انسانیت کا دوست ہے تو اسے اسرائیلی وزیراعظم نیتن یاہو کو اغوا کرنا چاہیے۔ انہوں نے کہا کہ دعا کریں کہ ترکیہ نیتن یاہو کو اغوا کر لے اور خطے میں جاری ناانصافیوں کا حساب برابر ہو جائے۔
خواجہ آصف کا کہنا تھا کہ افغان طالبان اور ٹی ٹی پی قابلِ اعتبار نہیں ہیں اور یہ بھارت کے ساتھ ملے ہوئے ہیں۔ انہوں نے الزام عائد کیا کہ خیبرپختونخوا کی حکومت کے بعض لوگ ٹی ٹی پی کو بھتہ دیتے ہیں۔
وزیر دفاع نے عالمی صورتحال پر بات کرتے ہوئے کہا کہ اگر چین کو تائیوان سے روکا نہیں جا سکتا تو اس کا مطلب یہ ہے کہ یوکرین کی جنگ کو بھی قانونی حیثیت مل جاتی ہے۔ انہوں نے کہا کہ یوکرین میں روسی حملے کے لیے کم از کم کوئی جواز پیش کیا گیا، مگر وینزویلا پر حملے کا تو کوئی جواز ہی موجود نہیں تھا، جس سے عالمی نظام تیزی سے تباہ ہو رہا ہے۔
ایران پر امریکی حملے سے پاکستان کیلئے چیلنج پیدا ہوگا: خواجہ آصف
وزیر دفاع نے خبردار کیا کہ ایران پر امریکی حملے کی صورت میں پاکستان کے لیے سنگین چیلنجز پیدا ہو سکتے ہیں۔ ان کا کہنا تھا کہ یا تو اسرائیل نے امریکا کو گمراہ کیا ہے یا پھر دونوں مل کر یہ سب کچھ کر رہے ہیں۔ انہوں نے یاد دلایا کہ 2012 میں اسرائیل یہ دعویٰ کرتا رہا کہ ایران چند دنوں میں ایٹم بم بنا لے گا۔
خواجہ آصف نے کہا کہ 2018 میں اقوام متحدہ میں بھی اسرائیل نے ایران کے خلاف جھوٹے الزامات لگائے، جن کا مقصد مستقبل میں ایران پر حملے کے لیے جواز پیدا کرنا تھا۔
