سکھر: وزیر داخلہ سندھ ضیا الحسن لنجار نے کہا ہے کہ کچے کے علاقوں میں آج سے بڑے پیمانے پر آپریشن کا آغاز کر دیا گیا ہے اور ڈاکوؤں کے خلاف سخت کارروائی کی جائے گی۔
سکھر میں میڈیا سے گفتگو کرتے ہوئے وزیر داخلہ سندھ کا کہنا تھا کہ کچے کے علاقے میں ایک بڑا اور فیصلہ کن آپریشن شروع کیا جا رہا ہے۔ انہوں نے واضح کیا کہ جو ڈاکو خود کو چیمپئن سمجھتے ہیں، ان کے خلاف سخت ترین کارروائی کی جائے گی، تاہم جو افراد ہتھیار ڈال دیں گے انہیں موقع دیا جائے گا۔
ضیا الحسن لنجار نے کہا کہ اس مرحلے پر آپریشن میں فوج کی ضرورت نہیں ہے، سندھ پولیس کے ساتھ رینجرز بھی آپریشن میں حصہ لے رہی ہے۔ ان کا کہنا تھا کہ ضرورت پڑنے پر پنجاب پولیس کی معاونت بھی حاصل کی جائے گی اور ڈاکوؤں کا مکمل خاتمہ کیا جائے گا۔
وزیر داخلہ سندھ نے مزید کہا کہ سندھ میں اب کہیں بھی حفاظتی کانوائے نہیں چل رہے اور کچے کے علاقوں میں امن و امان قائم کرنے کے لیے ڈاکوؤں کو نیست و نابود کیا جائے گا۔
