امریکا وہ واحد ملک ہے جس سے چین اور روس خوفزدہ ہیں: ٹرمپ کا دعویٰ

ٹرمپ کا دعویٰ: امریکا کے بغیر نیٹو بے اثر، روس اور چین دونوں خوفزدہ ہیں

امریکی صدر ڈونلڈ ٹرمپ نے کہا ہے کہ اگر امریکا نیٹو کا حصہ نہ ہوتا تو روس اور چین کو اس اتحاد کا کوئی خوف نہ ہوتا۔ صدر ٹرمپ نے سوشل میڈیا پر جاری بیان میں دعویٰ کیا کہ امریکا کے بغیر نیٹو بے اثر ہے، اور امریکا ہی وہ واحد قوم ہے جس سے روس اور چین دونوں خوفزدہ ہیں اور جس کا احترام کرتے ہیں۔

ٹرمپ نے اپنے پیغام میں یہ بھی کہا کہ انہوں نے 8 جنگیں ختم کروائیں اور ناروے نے نوبیل امن انعام کے لیے انہیں منتخب نہیں کیا، لیکن اس سے کوئی فرق نہیں پڑتا، اہم بات یہ ہے کہ انہوں نے لاکھوں جانیں بچائیں۔

صدر ٹرمپ نے مزید کہا کہ ان کی آمد سے قبل نیٹو کے اکثر رکن ممالک اپنی فوجی اخراجات کی ذمہ داریاں پوری نہیں کر رہے تھے، لیکن انہوں نے ممالک کو اپنی دفاعی اخراجات 5 فیصد جی ڈی پی تک بڑھانے پر مجبور کیا اور اب وہ فوری طور پر ادائیگیاں کر رہے ہیں۔

ٹرمپ نے اعتراف کیا کہ انہیں اس بات پر شک ہے کہ ضرورت پڑنے پر نیٹو ان کے لیے موجود ہوگا یا نہیں، لیکن انہوں نے کہا کہ وہ ہمیشہ نیٹو کے لیے موجود رہیں گے، چاہے نیٹو ان کے لیے موجود نہ ہو۔

امریکی صدر نے دعویٰ کیا کہ اگر وہ مداخلت نہ کرتے تو اس وقت روس پورے یوکرین پر قابض ہو چکا ہوتا، جس سے عالمی سیکیورٹی کے حوالے سے سنگین نتائج نکل سکتے تھے۔