امریکا میں امیگریشن اینڈ کسٹمز انفورسمنٹ حکام کی فائرنگ، خاتون اور مرد زخمی
امریکا میں امیگریشن اینڈ کسٹمز انفورسمنٹ (ICE) حکام کی جانب سے فائرنگ کا ایک اور واقعہ پیش آیا ہے جس میں ایک خاتون اور ایک مرد کو گولی مار کر زخمی کر دیا گیا۔
امریکی میڈیا رپورٹس کے مطابق یہ واقعہ ریاست اوریگن کے شہر پورٹ لینڈ میں پیش آیا جہاں آئی سی ای حکام نے کارروائی کے دوران دونوں افراد پر فائرنگ کی، جس کے نتیجے میں وہ زخمی ہو گئے۔ زخمی ہونے والے خاتون اور مرد کو فوری طور پر اسپتال منتقل کیا گیا جہاں انہیں طبی امداد فراہم کی جا رہی ہے۔
محکمہ ہوم لینڈ سکیورٹی کا کہنا ہے کہ واقعہ اس وقت پیش آیا جب بارڈر پیٹرول کے اہلکار ایک گاڑی کی تلاشی لے رہے تھے۔ حکام کے مطابق اس دوران ملزمان نے گاڑی کو بطور ہتھیار استعمال کیا اور اہلکاروں کو گاڑی سے کچلنے کی کوشش کی۔
محکمہ ہوم لینڈ سکیورٹی کے مطابق اہلکار نے اپنی جان کے دفاع میں دونوں افراد پر فائرنگ کی، جس کے نتیجے میں وہ زخمی ہوئے۔
واضح رہے کہ یہ پہلا واقعہ نہیں ہے، اس سے ایک روز قبل بھی ریاست منی سوٹا میں امیگریشن اینڈ کسٹمز انفورسمنٹ کے اہلکاروں نے چھاپے کے دوران ایک خاتون کو سر پر گولی مار کر ہلاک کر دیا تھا، جس پر انسانی حقوق کی تنظیموں اور عوامی حلقوں میں شدید تشویش پائی جا رہی ہے۔
امریکا میں امیگریشن حکام کی کارروائیوں کے دوران پیش آنے والے ایسے واقعات نے قانون نافذ کرنے والے اداروں کے طرزِ عمل اور طاقت کے استعمال پر ایک بار پھر سوالات کھڑے کر دیے ہیں۔
