خیبر: وادی تیراہ کے متاثرین کے لیے رجسٹریشن اور مالی امداد کا عمل جاری
صوبہ خیبرپختونخوا کے ضلع خیبر کے وادی تیراہ کے علاقے میدان ملک دین خیل سے نقل مکانی کرنے والے متاثرین کے لیے رجسٹریشن کا عمل گزشتہ تین روز سے جاری ہے، جبکہ شیڈول کے مطابق 10 جنوری سے باقاعدہ نقل مکانی کا آغاز کیا جائے گا۔
ضلعی انتظامیہ کے ذرائع کے مطابق متاثرین کے لیے وادی تیراہ کے علاقے پائیندی چینہ میں خصوصی رجسٹریشن سینٹر قائم کیا گیا ہے، جہاں اب تک مجموعی طور پر 2500 سے زائد خاندانوں کو رجسٹر کیا جا چکا ہے۔ ان میں سے 176 خاندانوں کو نادرا سمیت دیگر محکموں سے کلیئرنس کے بعد ابتدائی طور پر فی خاندان ڈھائی لاکھ روپے فراہم کیے گئے ہیں۔ دیگر رجسٹرڈ خاندانوں کو بھی ایڈوانس مالی امداد فراہم کی جارہی ہے۔
انتظامیہ کے مطابق شیڈول کے مطابق 10 جنوری سے باقاعدہ نقل مکانی کا عمل شروع ہوگا اور یہ عمل 25 جنوری تک جاری رہے گا۔ ہر خاندان کو نقل مکانی کے دوران ڈھائی لاکھ روپے ایڈوانس کے ساتھ ماہانہ 50 ہزار روپے امدادی رقم فراہم کی جائے گی، جس پر متاثرین اپنی مرضی کے مطابق رہائش اختیار کر سکیں گے۔
حکام کا کہنا ہے کہ علاقے میں دہشت گردوں کے خلاف آپریشن آئندہ دو ماہ کے اندر مکمل کر لیا جائے گا، جس کے بعد متاثرین کی واپسی اور بحالی کا عمل 5 اپریل سے شروع کیا جائے گا۔ وادی تیراہ کے علاقے میدان کی مجموعی آبادی تقریباً ایک لاکھ 30 ہزار افراد پر مشتمل ہے۔
انتظامیہ نے بتایا کہ آپریشن کے دوران مکمل طور پر تباہ ہونے والے مکان کے لیے 30 لاکھ روپے جبکہ جزوی تباہ شدہ مکان کے لیے 10 لاکھ روپے معاوضہ مقرر کیا گیا ہے۔
