پاکستان آئندہ برس جون میں آئی ایم ایف سے باہر ہوگا: رانا مشہود

پرائم منسٹر یوتھ پروگرام کے چیئرمین کا دعویٰ: پاکستان آئندہ برس جون میں آئی ایم ایف سے باہر ہوگا

پرائم منسٹر یوتھ پروگرام کے چیئرمین رانا مشہود احمد خان نے دعویٰ کیا ہے کہ پاکستان آئندہ سال جون تک آئی ایم ایف کے تحت ہونے والے پروگرام سے باہر ہوگا۔

لندن میں ایک تقریب سے خطاب کرتے ہوئے رانا مشہود احمد خان نے کہا کہ 2018 میں مسلط کردہ حالات کی وجہ سے پاکستان کئی سال پیچھے چلا گیا۔ انہوں نے کہا کہ مہنگائی اور غربت مسلط کرنے والے وزیراعظم کو قانونی طریقے سے ہٹایا گیا۔

رانا مشہود نے مزید کہا کہ عمران خان کے ذریعے پاکستان کے خلاف سازش ہوئی، اور نواز شریف نے 250 سے زائد مقدمات کا سامنا کیا لیکن نواز شریف کے خلاف بنائے گئے تمام کیسز جھوٹے ثابت ہوئے۔ ان کا کہنا تھا کہ "ایبسلوٹی ناٹ” کا نعرہ لگانے والے پھر انہی کے قدموں میں بیٹھ گئے۔

رانا مشہود احمد خان نے پی ٹی آئی چیئرمین پر بھی تنقید کی اور سوال اٹھایا کہ اگر کیس جھوٹے ہیں تو عدالتوں کا سامنا کرنے سے کیوں ڈرتے ہیں؟ انہوں نے گھڑی کیس کو اوپن اینڈ شٹ کیس قرار دیا۔

انہوں نے کہا کہ پاکستان کو بانی پی ٹی آئی کے دور میں کوئی نہیں پوچھتا تھا، جبکہ جنگ کے دوران متعدد ممالک ہمارے ساتھ تھے۔