نیو اسلام آباد ائیرپورٹ اور سندھ کی دو بجلی کمپنیوں کی نجکاری کا فیصلہ
اسلام آباد: وزیراعظم کے مشیر برائے نجکاری محمد علی کی زیر صدارت نجکاری کمیشن بورڈ کا اجلاس ہوا، جس میں متعدد اہم نجکاری فیصلے کیے گئے۔
بورڈ نے حیدرآباد الیکٹرک سپلائی کمپنی اور سکھر الیکٹرک سپلائی کمپنی کی نجکاری کے لیے ٹرانزیکشن کمیٹی قائم کرنے کی منظوری دی۔
اسی اجلاس میں ہاؤس بلڈنگ فائنانس کمپنی کی موجودہ نجکاری کے عمل کو ختم کرنے اور اس کے 51 فیصد حصص کی نیلامی دوبارہ شروع کرنے کی سفارش کی گئی۔ جبکہ پاکستان مورگیج ری فائنانس کمپنی کی 4.2 ارب روپے کی بولی مسترد کردی گئی، جبکہ اس کمپنی کی ریفرنس قیمت 13 ارب 55 کروڑ روپے مقرر تھی۔
اجلاس میں نجکاری بورڈ نے اسلام آباد انٹرنیشنل ائیرپورٹ کو نجکاری پروگرام میں شامل کرنے کی بھی سفارش کی، اور نیو اسلام آباد ائیرپورٹ کے لیے کنسیشن ماڈل اپنانے کا فیصلہ کیا گیا۔ ائیرپورٹ کی نجکاری میں گورنمنٹ ٹو گورنمنٹ ماڈل مسترد کر کے اوپن بولی کا راستہ اختیار کیا جائے گا۔
