شہرِ قائد ان دنوں شدید سرد موسم کی لپیٹ میں ہے، جہاں کم سے کم درجہ حرارت 6 ڈگری سینٹی گریڈ تک ریکارڈ کیا گیا ہے۔
محکمہ موسمیات کے مطابق آئندہ 24 گھنٹوں کے دوران موسم خشک جبکہ رات کے اوقات میں سرد رہنے کا امکان ہے۔ اس دوران کم سے کم درجہ حرارت 8 سے 10 ڈگری سینٹی گریڈ کے درمیان رہ سکتا ہے۔
محکمہ موسمیات کا کہنا ہے کہ شہر میں مجموعی طور پر کم سے کم درجہ حرارت 8.1 ڈگری سینٹی گریڈ ریکارڈ کیا گیا، جبکہ گزشتہ رات مختلف علاقوں میں درجہ حرارت میں واضح فرق دیکھا گیا۔
اعداد و شمار کے مطابق جناح ٹرمینل پر سب سے کم درجہ حرارت 6 ڈگری ریکارڈ کیا گیا۔ گلستانِ جوہر اور شاہراہِ فیصل میں کم سے کم درجہ حرارت 9 ڈگری رہا، جبکہ ماڑی پور میں 10 ڈگری اور بن قاسم میں 10.5 ڈگری سینٹی گریڈ ریکارڈ کیا گیا۔
محکمہ موسمیات کے مطابق شہر میں زیادہ سے زیادہ درجہ حرارت 24 ڈگری سینٹی گریڈ تک رہنے کا امکان ہے۔ اس وقت شہر میں ہوا میں نمی کا تناسب 44 فیصد ہے، جبکہ شمال مشرق کی سمت سے ہوائیں 7 کلومیٹر فی گھنٹہ کی رفتار سے چل رہی ہیں۔
