یوکرین مسئلے کا حل مذاکرات سے ہی ممکن ہے: پاکستانی مندوب

اقوام متحدہ میں پاکستان کے مستقل مندوب عاصم افتخار نے مذاکرات کو یوکرین مسئلے کا واحد حل قرار دے دیا ہے۔

سلامتی کونسل سے خطاب کرتے ہوئے عاصم افتخار نے کہا کہ یوکرین کے معاملے پر پائیدار امن کے لیے مکالمے کی بالادستی ہی واحد قابلِ عمل راستہ ہے۔

پاکستانی مندوب نے امریکا سمیت متعدد ممالک کی کوششوں کو سراہتے ہوئے امید ظاہر کی کہ تمام فریق جاری سفارتی عمل سے بھرپور فائدہ اٹھائیں گے۔ ان کا کہنا تھا کہ یہ کوششیں ایک منصفانہ اور پائیدار تصفیے پر منتج ہوں گی جو تمام فریقوں کے لیے قابلِ قبول ہو۔

انہوں نے مزید کہا کہ امید ہے یہ سفارتی کاوشیں یوکرین اور روس کے سلامتی مفادات سے ہم آہنگ ہوں گی اور یورپ میں امن و استحکام کو یقینی بنائیں گی۔