وزیر مملکت برائے داخلہ طلال چوہدری نے الزام عائد کیا ہے کہ قومی پالیسی پر ابہام پیدا کرنا ہی پی ٹی آئی کی پالیسی ہے۔
میڈیا سے گفتگو کرتے ہوئے طلال چوہدری نے کہا کہ وزیراعلیٰ خیبر پختونخوا یہ کہتے ہیں کہ افغانستان کو دہشت گردی کے ثبوت دینے چاہئیں، تو سوال یہ ہے کہ کیا سہیل آفریدی کو ابھی تک یہ معلوم نہیں کہ دہشت گردی کہاں سے ہو رہی ہے؟
انہوں نے کہا کہ 2025 میں پاکستان کی تاریخ کے سب سے زیادہ دہشت گردی کے واقعات پیش آئے ہیں، جن میں سب سے زیادہ تعداد خیبر پختونخوا میں ہونے والے واقعات کی ہے۔
وزیر مملکت برائے داخلہ کا کہنا تھا کہ خیبر پختونخوا میں سیف سٹی اس لیے نہیں بنایا جاتا کیونکہ اس سے دہشت گردوں کی گرفتاری ممکن ہو سکتی ہے۔
طلال چوہدری نے واضح پیغام دیتے ہوئے کہا کہ آپ سیاسی تحریک سو دفعہ چلائیں، لیکن پاکستان کے خلاف رویہ کسی صورت برداشت نہیں کیا جائے گا۔ وزیراعلیٰ ہو یا کوئی عام رہنما، قومی بیانیے کے خلاف کسی قسم کی گفتگو برداشت نہیں کی جائے گی۔
