ایرانی سپریم لیڈر آیت اللہ خامنہ ای نے حکومت کے حق میں ہونے والے مظاہروں پر قوم کو خراجِ تحسین پیش کیا ہے۔
سوشل میڈیا پر جاری پیغام میں آیت اللہ خامنہ ای نے کہا کہ عظیم ایرانی قوم نے آج ایک تاریخی دن رقم کیا ہے۔ ان کے مطابق آج کی عظیم ریلیوں نے غیر ملکی دشمنوں کی سازشوں کو خاک میں ملا دیا۔
انہوں نے کہا کہ غیر ملکی دشمنوں کی سازشوں پر اندرونی کرائے کے ایجنٹوں سے عمل کروایا جانا تھا، لیکن عظیم ایرانی قوم نے دشمنوں کے مقابلے میں اپنے عزم اور اپنی شناخت کا بھرپور اظہار کیا۔ آیت اللہ خامنہ ای کا کہنا تھا کہ آج کے مظاہرے امریکی سیاست دانوں کے لیے ایک واضح پیغام اور وارننگ تھے۔
ایرانی سپریم لیڈر نے کہا کہ امریکا اپنے فریبی اقدامات بند کرے اور اپنے آلہ کاروں پر بھروسہ کرنا چھوڑ دے۔ ان کے مطابق ایرانی قوم مضبوط، طاقتور اور باخبر ہے، دشمن کو پہچانتی ہے اور ہمیشہ اس کے خلاف میدان میں موجود رہتی ہے۔
یاد رہے کہ ایرانی دارالحکومت تہران میں حکومت کے حق میں بڑا عوامی مظاہرہ ہوا جس میں مرد و خواتین نے بڑی تعداد میں شرکت کی۔ مظاہرین نے ایرانی پرچم اور آیت اللہ خامنہ ای کی تصاویر اٹھا رکھی تھیں۔
