وائٹ ہاؤس کی پریس سیکرٹری کیرولین لیوٹ نے کہا ہے کہ امریکی صدر ڈونلڈ ٹرمپ ایران کے معاملے پر ضرورت پڑنے کی صورت میں فوجی طاقت کے استعمال سے گریز نہیں کریں گے۔
فوکس نیوز کو انٹرویو دیتے ہوئے کیرولین لیوٹ کا کہنا تھا کہ صدر ٹرمپ ہمیشہ سفارتکاری کو اولین ترجیح دیتے رہے ہیں، تاہم اگر وہ ضروری سمجھیں تو فوجی طاقت کے استعمال سے بھی نہیں ہچکچائیں گے اور اس حقیقت سے ایرانی حکومت بخوبی آگاہ ہے۔
وائٹ ہاؤس کی ترجمان کے مطابق صدر ٹرمپ آئندہ کیا قدم اٹھائیں گے، اس کا علم صرف خود صدر کو ہی ہے۔
کیرولین لیوٹ نے مزید کہا کہ ایرانی حکومت کے عوامی اور نجی سطح پر دیے جانے والے بیانات میں واضح تضاد پایا جاتا ہے۔ ان کے مطابق ایرانی حکومت عوامی طور پر کچھ اور مؤقف اختیار کرتی ہے جبکہ نجی طور پر امریکا کو مختلف نوعیت کے پیغامات بھیج رہی ہے۔
تاہم وائٹ ہاؤس کی ترجمان نے ان نجی بات چیت کی نوعیت یا تفصیلات بتانے سے گریز کیا۔
