سڈنی: بگ بیش لیگ (بی بی ایل) میں میلبورن رینیگیڈز کے کپتان نے محمد رضوان کو بظاہر سست بیٹنگ کرنے پر دوران میچ ریٹائر آؤٹ کر دیا۔
پیر کو بی بی ایل کے 15ویں ایڈیشن کے 33ویں میچ میں یہ غیر معمولی واقعہ پیش آیا، جب میلبورن رینیگیڈز نے سڈنی تھنڈر کے خلاف میچ کے دوران وکٹ کیپر بیٹر محمد رضوان کو خود پویلین واپس جانے کا اشارہ کیا تاکہ کپتان خود بیٹنگ کے لیے آ سکیں۔
محمد رضوان 23 گیندوں پر 26 رنز بنا کر کریز پر موجود تھے۔ بی بی ایل کی جانب سے سوشل میڈیا پر شیئر کی گئی ویڈیو میں دیکھا جا سکتا ہے کہ کپتان ول سدرلینڈ محمد رضوان کو پویلین جانے کا اشارہ کر رہے ہیں۔ اس دوران کمنٹیٹر نے بھی کہا کہ یہ بہت اچھا کیا، اور یہ کچھ وقت پہلے بھی کیا جا سکتا تھا۔
یہ واقعہ سوشل میڈیا پر وائرل ہو گیا اور شائقینِ کرکٹ نے محمد رضوان کو زبردستی ریٹائر آؤٹ کیے جانے کو شرمناک قرار دیا۔
واضح رہے کہ محمد رضوان اس بی بی ایل سیزن میں بیٹنگ کے اعتبار سے مشکلات کا شکار رہے ہیں۔ وہ اب تک 8 میچوں میں 167 رنز بنا سکے ہیں، ان کی اوسط 20.88 رہی اور وہ ایک بھی نصف سنچری اسکور کرنے میں ناکام رہے۔
میچ کی مجموعی صورتحال کے مطابق، میلبورن رینیگیڈز نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 170 رنز بنائے۔
