اسلام آباد: پاکستان اور متحدہ عرب امارات کے درمیان پری امیگریشن کلیئرنس کا باضابطہ معاہدہ کرنے پر اتفاق کرلیا گیا ہے۔
وزیر داخلہ محسن نقوی سے یو اے ای کے ڈی جی کسٹمز و پورٹ سیکیورٹی احمد بن لاحج الفلاسی کی قیادت میں وفد نے ملاقات کی، جس میں پاک یو اے ای تعلقات، باہمی تعاون اور امیگریشن کے عمل کو مزید آسان بنانے پر تفصیلی تبادلہ خیال کیا گیا۔
اعلامیے کے مطابق ملاقات میں اس بات پر اتفاق کیا گیا کہ پاکستان اور یو اے ای کے درمیان پری امیگریشن کلیئرنس کا باضابطہ معاہدہ کیا جائے گا۔ اس نئے نظام کا آغاز ابتدائی طور پر پائلٹ بنیادوں پر کیا جائے گا، جبکہ پہلے مرحلے میں پائلٹ منصوبے کا آغاز کراچی سے ہوگا۔
محسن نقوی کا کہنا تھا کہ اس معاہدے کے تحت مسافروں کی امیگریشن اور کلیئرنس پاکستان میں ہی مکمل ہوگی، جس کے بعد مسافروں کو یو اے ای پہنچنے پر طویل امیگریشن کارروائی سے نہیں گزرنا پڑے گا۔ انہوں نے کہا کہ مسافر ڈومیسٹک مسافروں کی طرح سیدھا ایئرپورٹ سے باہر نکل سکیں گے، جس سے سفر میں سہولت، وقت کی بچت اور مجموعی طور پر بہتر سفری تجربہ میسر آئے گا۔
اعلامیے کے مطابق پائلٹ منصوبے کو حتمی شکل دینے کے لیے دونوں ممالک کے حکام رابطہ کاری جاری رکھیں گے، جبکہ پائلٹ پروجیکٹ کی کامیابی کے بعد اس نظام کو مرحلہ وار مزید مقامات تک توسیع دی جائے گی۔
یو اے ای وفد نے اس اقدام کو عوام کے لیے مفید قرار دیتے ہوئے ہر ممکن تعاون کی یقین دہانی بھی کرائی ہے۔
