کراچی سے ٹینکرز اور ہائیڈرنٹس کے ذریعے پانی کی فراہم ختم کرنے کا فیصلہ

کراچی: شہر میں ٹینکرز اور ہائیڈرنٹس کے ذریعے پانی کی فراہمی ختم کرنے کا فیصلہ کرلیا گیا ہے۔

کے ایم سی حکام کے مطابق میئر کراچی مرتضیٰ وہاب نے واٹر کارپوریشن کے اعلیٰ حکام کو متبادل نظام تیار کرنے کی ہدایت جاری کردی ہے۔

مرتضیٰ وہاب نے حکام کو ہدایت دیتے ہوئے کہا کہ کراچی میں موجود تمام ساتوں واٹر ہائیڈرنٹس کو مرحلہ وار ختم کیا جائے اور شہریوں کو لائنوں کے ذریعے پانی کی فراہمی یقینی بنائی جائے۔ ان کا کہنا تھا کہ مقصد یہ ہے کہ شہریوں کو ان کی دہلیز پر پائپ لائن کے ذریعے پانی فراہم کیا جا سکے۔

میئر کراچی کے مطابق واٹر ہائیڈرنٹس سے ماہانہ تقریباً 30 کروڑ روپے کا ریونیو حاصل ہوتا ہے، تاہم ہائیڈرنٹس کا کنٹریکٹ گزشتہ سال ختم ہوچکا ہے اور اب نئے کنٹریکٹس جاری نہیں کیے جائیں گے۔ انہوں نے واضح کیا کہ شہریوں کو ٹینکرز کے نظام سے نجات دلانا اولین ترجیح ہے۔

مرتضیٰ وہاب نے مزید کہا کہ کراچی میں پانی کی کمی کو متبادل دنوں میں ہر علاقے کو پانی فراہم کرکے پورا کیا جائے گا۔ ان کا کہنا تھا کہ ٹینکرز کے ذریعے پانی کی فراہمی کوئی مستقل حل نہیں اور اس نظام کی وجہ سے شہریوں کو شدید مشکلات کا سامنا کرنا پڑتا ہے۔