واٹس ایپ صارفین ہوشیار ہوجائیں کیونکہ واٹس ایپ اکاؤنٹس ہائی جیک ہونے کے خطرات میں اضافہ ہوگیا ہے۔
کابینہ ڈویژن کے تحت نیشنل سائبر ایمرجنسی رسپانس ٹیم (NCERT) نے اس حوالے سے باضابطہ ایڈوائزری جاری کردی ہے، جس میں 2026 کے دوران واٹس ایپ ہائی جیک مہم سے خبردار کیا گیا ہے۔ ایڈوائزری میں صارفین کو سائبر خطرات کے خلاف انتہائی محتاط رہنے کا مشورہ دیا گیا ہے۔
ایڈوائزری کے مطابق ہیکرز واٹس ایپ صارفین کے اکاؤنٹس تک غیرمجاز رسائی حاصل کرنے کے لیے سرگرم ہیں، جس میں خاص طور پر OTP فراڈ اسکیمز استعمال کی جا رہی ہیں۔ اس طریقہ کار کے ذریعے صارفین کو دھوکا دے کر ان کے اکاؤنٹس کا کنٹرول حاصل کیا جاتا ہے۔
حکام نے خبردار کیا ہے کہ اکاؤنٹ ہائی جیک ہونے کی صورت میں حملہ آور صارف کے ذاتی ڈیٹا تک رسائی حاصل کر سکتے ہیں، جن میں کنٹیکٹ لسٹ، چیٹ ہسٹری، میڈیا فائلز اور ذاتی گفتگو شامل ہے۔ مزید یہ کہ متاثرہ صارف کی کنٹیکٹ لسٹ کو پیسے بٹورنے یا فراڈ پیغامات بھیجنے کے لیے بھی استعمال کیا جاتا ہے۔
ایڈوائزری میں واضح طور پر کہا گیا ہے کہ 6 ہندسوں پر مشتمل ایس ایم ایس ویری فکیشن کوڈ کسی کے ساتھ شیئر نہ کریں۔ اسی طرح ٹو اسٹیپ ویری فکیشن پن بھی کسی کو نہ بتایا جائے۔
حکام نے یہ بھی ہدایت کی ہے کہ وائس کال یا ایس ایم ایس کے ذریعے موصول ہونے والے کسی بھی قسم کے کوڈز کسی صورت شیئر نہ کیے جائیں، کیونکہ یہی کوڈز اکاؤنٹ ہائی جیکنگ کا بنیادی ذریعہ بن رہے ہیں۔
