ٹیسلا اور اسپیس ایکس کے بانی ایلون مسک نے ایران میں مفت اسٹار لنک انٹرنیٹ فراہم کر دیا۔
امریکی میڈیا کے مطابق ایلون مسک کی کمپنی اسپیس ایکس نے ایران میں اسٹار لنک سیٹلائٹ سروس کے ذریعے صارفین کو مفت انٹرنیٹ کی سہولت دینا شروع کر دی ہے۔ یہ اقدام ایسے وقت میں سامنے آیا ہے جب ایران میں کئی روز سے انٹرنیٹ بند ہے اور پُرتشدد مظاہروں کے دوران ہلاکتوں کی درست تعداد معلوم کرنا بھی مشکل ہو چکا ہے۔
رپورٹس کے مطابق ایران میں پہلے سے غیر فعال اسٹار لنک اکاؤنٹس کو دوبارہ فعال کر دیا گیا ہے جبکہ ان صارفین کی سبسکرپشن فیس بھی معاف کر دی گئی ہے، جس کے باعث ہزاروں افراد کو رابطے اور معلومات تک رسائی ممکن ہو گئی ہے۔
رپورٹ میں یہ بھی بتایا گیا ہے کہ ایرانی حکومت کی جانب سے بعض علاقوں میں جیمزر نصب کیے گئے ہیں تاکہ مفت انٹرنیٹ کی فراہمی کو روکا جا سکے، تاہم اس کے باوجود کئی علاقوں میں اسٹار لنک کے ذریعے انٹرنیٹ سروس بحال ہے۔
امریکی میڈیا کا کہنا ہے کہ ایران میں مفت اسٹار لنک انٹرنیٹ فراہم کرنے کا فیصلہ صدر ٹرمپ اور ایلون مسک کے درمیان حالیہ ٹیلیفونک رابطے کے بعد سامنے آیا۔ ٹیلیفونک گفتگو کے دوران ایران میں اسٹار لنک سروس کی فراہمی اور موجودہ صورتحال پر تفصیلی تبادلہ خیال کیا گیا تھا۔
