سینئر اداکارہ صبا فیصل نے کہا ہے کہ آج کل نوجوانوں میں سیکھنے کی لگن کم ہوگئی ہے اور ہر کوئی خود کو عقلِ کل سمجھتا ہے۔
حال ہی میں صبا فیصل نے سرکاری ٹی وی چینل کے پروگرام میں مہمان کے طور پر شرکت کی اور مختلف موضوعات پر اپنے خیالات کا اظہار کیا۔
اداکارہ نے کہا کہ آج کل سکھانے کا رواج ختم ہوچکا ہے، اس لیے نوجوانوں میں سیکھنے کی جستجو نہیں رہ گئی کیونکہ ہر کوئی سمجھتا ہے کہ میں سب کچھ جانتا ہوں۔
انہوں نے مزید کہا کہ جب ہم اپنی شوٹنگ کے سیٹ پر جاتے ہیں تو نئے اداکار آتے ہیں، ہم ان سے محتاط رہتے ہیں کہ اگر ہم نے کچھ بتایا تو شاید آگے سے جواب آئے۔
صبا فیصل نے بتایا کہ نئے اداکار اچھا کام کر رہے ہیں، لیکن کچھ ایسے بھی ہیں جنہیں بنیادی فٹ ورک جیسی چیزیں سکھائی جانی چاہیے۔
انہوں نے پی ٹی وی کے سنہرے دور کو یاد کرتے ہوئے کہا کہ تب ہمارے سینئرز ہمیں سکھاتے اور بار بار ریہرسل کرواتے تھے، جس کا اثر ہماری پیشہ ورانہ مہارت پر پڑا۔
