ای سی سی نے دفاعی منصوبوں اور دیگر اہم پروگرامز کے لیے گرانٹس کی منظوری دے دی
اسلام آباد: اقصادی رابطہ کمیٹی (ای سی سی) نے دفاعی منصوبوں کے لیے 5 ارب 8 کروڑ روپے کی تکنیکی ضمنی گرانٹ منظور کرلی۔ وزارت خزانہ کی جانب سے جاری اعلامیے کے مطابق ای سی سی کے اجلاس کی صدارت وزیر خزانہ محمد اورنگزیب نے کی۔
اعلامیے میں بتایا گیا کہ پنجاب میں ایس ڈی جی پروگرام کے لیے 2 ارب روپے، اسلام آباد میں آٹزم سینٹر کے لیے خصوصی بچوں کی ٹرانسپورٹ کے لیے 32 کروڑ روپے کی گرانٹ منظور کی گئی۔ آسان خدمت مرکز اسلام آباد کے قیام کے لیے 80 کروڑ روپے جبکہ ڈیجیٹل کنیکٹیوٹی اور آئی ٹی منصوبوں کے لیے 3 ارب 70 کروڑ روپے کی منظوری دی گئی۔
ایف بی آر کے ڈیجیٹل انفورسمنٹ اسٹیشنز کے لیے 3 ارب روپے جاری کرنے کی منظوری بھی دی گئی اور ایشیا پیٹرولیم لمیٹڈ پائپ لائن پر مستقبل کے لائحہ عمل کے لیے کمیٹی قائم کی گئی۔ علاوہ ازیں، فلم و ڈرامہ فنانس فنڈ کے لیے 70 کروڑ روپے کی منظوری دی گئی اور ہدایت کی گئی کہ یہ فنڈز فلم اور ڈرامہ صنعت کے فروغ کے لیے شفاف طریقے سے خرچ کیے جائیں۔
