اسلام آباد: حکومت نے نئے کرنسی نوٹ متعارف کرانے کا فیصلہ کر لیا ہے۔
وزیراعظم شہباز شریف کی زیرِ صدارت وفاقی کابینہ کا اہم اجلاس منعقد ہوا، جس میں ملکی معیشت اور مالیاتی امور سے متعلق مختلف امور پر غور کیا گیا۔
اجلاس کے بعد جاری اعلامیے کے مطابق وزارتِ خزانہ کی جانب سے اسٹیٹ بینک آف پاکستان کی طرف سے جاری کیے جانے والے بینک نوٹوں کے نئے ڈیزائن کے حوالے سے وفاقی کابینہ کو تفصیلی بریفنگ دی گئی۔ بریفنگ کے بعد وفاقی کابینہ نے کرنسی نوٹوں کے نئے ڈیزائن پر مزید غور و خوض کے لیے ایک خصوصی کابینہ کمیٹی تشکیل دینے کی منظوری دے دی۔
کابینہ کو آگاہ کیا گیا کہ نئے کرنسی نوٹوں کو جدید اور عصری تقاضوں کے مطابق ڈیزائن کیا جا رہا ہے، تاکہ عالمی معیار کے مطابق سکیورٹی اور خوبصورتی کو یقینی بنایا جا سکے۔ اس مقصد کے لیے بین الاقوامی سطح کے ماہرین کی خدمات حاصل کی گئی ہیں۔
بریفنگ میں بتایا گیا کہ 100، 500، 1000 اور 5000 روپے مالیت کے بینک نوٹوں کے نئے ڈیزائن متعارف کروائے جائیں گے۔ نئے کرنسی نوٹوں میں پہلے کے مقابلے میں زیادہ مؤثر اور جدید سکیورٹی تھریڈ استعمال کیا جائے گا تاکہ جعل سازی اور نقلی نوٹوں کی روک تھام ممکن بنائی جا سکے۔
کابینہ کو یہ بھی بتایا گیا کہ نئے نوٹوں کے ڈیزائن میں پاکستان کی علاقائی اور جغرافیائی تنوع کو نمایاں کیا جائے گا، جب کہ ملکی تاریخی یادگاروں کو بھی ڈیزائن کا حصہ بنایا گیا ہے۔ اس کے علاوہ خواتین کی قومی ترقی میں شمولیت کو اجاگر کرنے کے ساتھ ساتھ ماحولیاتی تبدیلی جیسے اہم سماجی موضوعات کو بھی کرنسی نوٹوں کے ڈیزائن میں شامل کیا جائے گا۔
