تہران: ایران میں سکیورٹی صورتحال کے پیش نظر امریکا کے بعد اسپین، پولینڈ اور اٹلی نے اپنے شہریوں کو ایران فوری طور پر چھوڑنے کی ہدایت کر دی ہے۔
اٹلی کی وزارتِ خارجہ کے مطابق ایران میں تقریباً 600 اطالوی شہری مقیم ہیں، جن میں اکثریت دارالحکومت تہران میں رہائش پذیر ہے۔ بیان میں شہریوں کو ہدایت کی گئی ہے کہ وہ سکیورٹی صورتحال کے پیش نظر ایران سے فوراً انخلا یقینی بنائیں۔
پولینڈ کی وزارتِ خارجہ نے بھی سوشل میڈیا پلیٹ فارم ایکس پر اپنے شہریوں سے کہا ہے کہ وہ فوری طور پر ایران چھوڑیں اور دستیاب تمام ذرائع نقل و حمل کا استعمال کریں۔
میڈیا رپورٹس کے مطابق برطانیہ نے ایران سے اپنے تمام سفارتی عملے کو نکال لیا ہے جبکہ برطانوی سفیر کو بھی ملک سے واپس بلا لیا گیا ہے۔ جرمنی نے اپنے طیاروں کو ایرانی فضائی حدود استعمال نہ کرنے کا حکم دے دیا ہے۔
ادھر تہران میں بھارتی سفارتخانے نے بھی اپنے شہریوں کو ایران چھوڑنے کی ہدایت جاری کی ہے۔ بیان میں کہا گیا کہ بدلتی ہوئی سکیورٹی صورتحال کے پیش نظر بھارتی شہری دستیاب نقل و حمل کے ذرائع استعمال کر کے ایران سے باہر نکلیں۔
