فیفا ورلڈ کپ شروع ہونے سے پہلے ہی نیا ریکارڈ بن گیا۔
رپورٹس کے مطابق رواں سال ہونے والے فٹبال ورلڈ کپ 2026 کے لیے فیفا کو مختلف میچوں کے ٹکٹس کی ریکارڈ 50 کروڑ سے زائد درخواستیں موصول ہوئی ہیں، جو عالمی سطح پر فٹبال کی بے پناہ مقبولیت کا واضح ثبوت ہیں۔
رپورٹ میں بتایا گیا ہے کہ شائقین کی جانب سے سب سے زیادہ ڈیمانڈ 17 جون کو میامی میں ہونے والے کولمبیا اور پرتگال کے میچ کے لیے سامنے آئی ہے، جس کے ٹکٹس کے لیے سب سے زیادہ درخواستیں موصول ہوئیں۔
واضح رہے کہ فیفا ورلڈ کپ 2026 کی میزبانی امریکا، میکسیکو اور کینیڈا مشترکہ طور پر کر رہے ہیں۔ یہ میگا ایونٹ 11 جون سے 19 جولائی تک جاری رہے گا، جس میں تاریخ میں پہلی بار 48 ٹیمیں حصہ لیں گی۔
فیفا ورلڈ کپ 2026 کی فاتح ٹیم کو 5 کروڑ ڈالر کی خطیر انعامی رقم دی جائے گی، جبکہ پچھلے ایڈیشن کی فاتح ٹیم کو 4 کروڑ 20 لاکھ ڈالر انعام کے طور پر ملے تھے، یوں اس بار انعامی رقم میں نمایاں اضافہ کیا گیا ہے۔
اسی طرح ورلڈ کپ کی رنر اپ ٹیم کو 3 کروڑ 30 لاکھ ڈالر کی انعامی رقم دی جائے گی، جو ٹورنامنٹ کی مالی اہمیت اور عالمی دلچسپی کو مزید بڑھا رہی ہے۔
