اولمپکس 2036 کی میزبانی کے خواہشمند بھارت کی میزبانی کا پول انڈین اوپن بیڈمنٹن میں کھل گیا۔
بھارتی دارالحکومت نئی دہلی میں جاری انڈین اوپن بیڈمنٹن کے دوران مینز سنگلز کا میچ اس وقت رک گیا جب کورٹ پر پرندے کی بیٹ آ گری، جس کے باعث کھیل کچھ دیر کے لیے معطل کرنا پڑا۔
اندرا گاندھی اسٹیڈیم میں جاری اس بین الاقوامی ٹورنامنٹ کو پرندے کی بیٹ گرنے کے واقعات کے باعث دو مرتبہ روکنا پڑا، جس نے ایونٹ کے انتظامات اور حفاظتی انتظامات پر سوالات کھڑے کر دیے۔
دو روز قبل ڈنمارک کی ایک خاتون کھلاڑی نے بھی ایونٹ کے دوران غیر صحت مند ماحول کی نشاندہی کی تھی اور فضائی آلودگی پر تشویش کا اظہار کیا تھا۔
اس کے علاوہ گزشتہ روز ایونٹ کے اسٹیڈیم میں بندر کی موجودگی کی تصاویر بھی سوشل میڈیا پر وائرل ہوئیں، جس پر صارفین نے انتظامیہ کو شدید تنقید کا نشانہ بنایا۔
واضح رہے کہ ڈنمارک کے معروف کھلاڑی آندریس اینٹونسن نے بھی فضائی آلودگی کی وجہ سے ٹورنامنٹ سے دستبرداری کا اعلان کیا تھا، جس کے بعد ایونٹ کے معیار اور میزبان ملک کے دعوؤں پر مزید سوالات اٹھ گئے ہیں۔
