اسلام آباد: وزیراعظم شہباز شریف نے سعودی شہزادی ہند بنت سعود بن عبدالعزیز آل سعود کے انتقال پر سعودی شاہی خاندان سے اظہار تعزیت کیا ہے۔
سوشل میڈیا پلیٹ فارم ایکس پر جاری اپنے پیغام میں وزیراعظم شہباز شریف نے سعودی عرب کی شہزادی ہند بنت سعود بن عبدالعزیز آل سعود کے انتقال پر سعودی شاہی خاندان اور سعودی عوام سے دلی تعزیت کا اظہار کیا۔
وزیراعظم شہباز شریف نے کہا کہ اس دکھ کی گھڑی میں پاکستان کے عوام سعودی عرب کے عوام اور مملکت کے ساتھ مکمل یکجہتی کا اظہار کرتے ہیں اور اس غم میں برابر کے شریک ہیں۔
انہوں نے مرحومہ کے اہلِ خانہ کے لیے صبر اور حوصلے کی دعا کرتے ہوئے کہا کہ پاکستان اس مشکل وقت میں سعودی شاہی خاندان کے دکھ کو اپنا دکھ سمجھتا ہے۔
واضح رہے کہ سعودی شہزادی ہند بنت سعود بن عبدالعزیز آل سعود کی نمازِ جنازہ گزشتہ روز ریاض میں ادا کی گئی تھی۔
